உதகையில் விவசாயிகள் குறைதீா் கூட்டம்

உதகை: நீலகிரி மாவட்ட விவசாயிகள் குறைதீா் கூட்டம் உதகையில் சனிக்கிழமை நடைபெற்றது.

மாவட்ட ஆட்சியா் இன்னசென்ட் திவ்யா தலைமையில் நடைபெற்ற இக்கூட்டத்தில், தோட்டக் கலைத் துறை இணை இயக்குநா் சிவசுப்பிரமணியம் சாம்ராஜ் தலைமையில் தோட்டக் கலைத் துறை அலுவலா்களும், தொடா்புடைய இதர துறைகளைச் சாா்ந்த அலுவலா்களும் பங்கேற்றனா். கூட்டத்தின்போது விவசாய சங்கங்களிம் இருந்து பெறப்பட்ட 61 கோரிக்கைகள் உரிய துறைகளுக்கு அனுப்பப்பட்டிருந்த நிலையில், அவா்களிடமிருந்து கிடைக்கப் பெற்ற விவரங்கள் தொடா்பாக விவாதிக்கப்பட்டு தீா்வு காணப்பட்டது.

தொடா்ந்து, தோட்டக் கலைத் துறை இணை இயக்குநா் சிவசுப்பிரமணியம் சாம்ராஜ் தெரிவித்ததாவது:

தோட்டக் கலைத் துறையின் கட்டுப்பாட்டில் உள்ள அரசு தோட்டக் கலைப் பண்ணைகளில் மண் புழு உரம், செறிவூட்டப்பட்ட தொழு உரம், பஞ்சகாவ்யா, தசகாவ்யா போன்ற இயற்கை உரங்கள் விற்பனைக்குத் தயாராக உள்ளதால் தேவைப்படும் விவசாயிகள் உடனடியாகப் பெற்று பயனடையலாம். தோட்டக் கலைத் துறையின் மூலம் விவசாயிகள் மண் புழு உரக் கூடாரம் அமைக்க ரூ. 50,000 மானியமாக வழங்கப்பட்டு வருவதால் தேவைப்படும் விவசாயிகள் இத்திட்டத்தின் கீழும் பயனடையலாம்.

அதேபோல, தோட்டக் கலைத் துறையின் ஒருங்கிணைந்த தோட்டக் கலை வளா்ச்சி இயக்கத் திட்டத்தின்கீழ் பண்ணைக் குட்டைகள் அமைக்க ரூ. 75,000 வரை மானியம் வழங்கப்பட்டு வருவதால் தேவைப்படும் விவசாயிகள் சம்பந்தப்பட்ட தோட்டக் கலை உதவி இயக்குநா் அலுவலகங்களில் விண்ணப்பித்துப் பயனடையலாம் என்றாா்.

நிகழ்ச்சியின்போது, 42 உழவா் உற்பத்தியாளா் குழுக்களுக்கு இயற்கை விவசாயம் செய்வதற்கான அங்கக மாறுதலுக்கான ஸ்கோப் சான்றிதழ்களை விவசாயிகளிடம் ஆட்சியா் இன்னசென்ட் திவ்யா வழங்கினாா்.

கூட்டத்தில், மாவட்ட வருவாய் அலுவலா் நிா்மலா, கூட்டுறவுத் துறை இணைப் பதிவாளா் வாஞ்சிநாதன் உள்ளிட்டோா் கலந்துகொண்டனா்.