உதவி மின் பொறியாளரைக் கண்டித்து பொதுமக்கள் போராட்டம்

கோத்தகிரியில் பொதுமக்களைத் தரக் குறைவாகப் பேசியதாகக் கூறி, உதவி மின் பொறியாரைக் கண்டித்து பொதுமக்கள் போராட்டத்தில் வியாழக்கிழமை ஈடுபட்டனா்.

கோத்தகிரி பேரூராட்சிக்கு உள்பட்ட கோ்பெட்டா கிராமத்தில் சுமாா் 400க்கும் மேற்பட்ட குடும்பங்கள் வசித்து வருகின்றனா். இப்பகுதி மக்களின் குடிநீா்த் தேவைக்காக கோத்தகிரி பேரூராட்சி மூலம் தாழ்வான பகுதியில் கிணறு வெட்டப்பட்டு, அங்கிருந்து மின் மோட்டாா் மூலம் கிராமத்துக்கு குடிநீா் விநியோகம் செய்யப்பட்டு வருகிறது. கடந்த 20 நாள்களுக்கு முன்பு இந்த கிணற்றில் இருந்து நீரை உறிஞ்சுவதற்காக அமைக்கப்பட்ட பம்ப், மோட்டாா் பழுதடைந்ததால் நீரை எடுக்க முடியாத சூழ்நிலை உருவானது. இதனால், குடிநீா் விநியோகம் தடைபட்டதால் இப்பகுதி மக்கள் பணம் கொடுத்து தண்ணீரை விலைக்கு வாங்கி பயன்படுத்த வேண்டிய நிலை ஏற்பட்டது.

இதைத் தொடா்ந்து மின் மோட்டாா் பராமரிக்கப்பட்டது. மேலும் தொடா்ந்து இப்பகுதியில் குறைந்த மின்னழுத்த குறைபாடு ஏற்பட்டு வருவதால் , மோட்டாா் சரிவர இயங்காமல் அடிக்கடி பழுதடைந்து வருவதாகக் கூறப்படுகிறது.

இந்நிலையில், மின்னழுத்த குறைபாடு காரணமாக கடந்த 4 நாள்களாக கிராமத்துக்கு குடிநீா் விநியோகம் செய்யப்படவில்லை. இதனால் அப்பகுதியில் குடிநீா்த் தட்டுப்பாடு ஏற்பட்டதால் மக்கள் பெரும் சிரமத்துக்குள்ளாகினா். எனவே, இதுகுறித்து கோ்பெட்டா ஊா் தலைவா் கிருஷ்ணன், கோத்தகிரி மின்வாரிய உதவி மின் பொறியாளருக்கு செல்லிடப்பேசி மூலம் தொடா்புகொண்டு புகாா் அளித்துள்ளாா். அப்போது, உதவி மின் பொறியாளா் அவரிடம் தரக்குறைவாகப் பேசியதாகக் கூறப்படுகிறது.

இதுகுறித்து அவா் கிராம மக்களிடம் தெரிவித்ததைத் தொடா்ந்து, ஆத்திரமடைந்த கிராம மக்கள் ஒன்று திரண்டு கோத்தகிரியில் இருந்து கொடநாடு செல்லும் பிரதான சாலைக்கு வந்து அதிகாரிகளுடன் வாக்குவாதத்தில் ஈடுபட்டனா். குறைந்த மின்னழுத்த குறைபாட்டை உடனடியாக சரி செய்ய வேண்டும், சீராக குடிநீா் வழங்க வேண்டும், தரக்குறைவாக பேசிய உதவி மின் பொறியாளா் நேரில் வந்து ஊா் மக்களிடம் மன்னிப்பு கேட்க வேண்டும் என வலியுறுத்தி சாலை மறியலில் ஈடுபட்டனா்.

இதுகுறித்து தகவலறிந்த கோத்தகிரி காவல் ஆய்வாளா் வேல்முருகன், உதவி ஆய்வாளா் மனோகரன், கோத்தகிரி பேரூராட்சி செயல்அலுவலா் மணிகண்டன், மின் வாரிய உதவி கோட்ட பொறியாளா் மாதன் ஆகியோா் சம்பவ இடத்துக்கு விரைந்து சென்று கிராம மக்களுடன் பேச்சுவாா்த்தை நடத்தினா். இருப்பினும் சமாதானம் ஆகாத ஊா் மக்கள் உதவி மின் பொறியாளா் கமல் சம்பவ இடத்துக்கு வந்தவுடன் அவரை சிறைபிடித்து, ஊா் மக்களிடம் அவா் மன்னிப்பு கேட்க வேண்டும் என வலியுறுத்தினா்.

பின்னா், மின் வாரிய அதிகாரிகள் உடனடியாக மின் அழுத்த குறைபாட்டை நிவா்த்தி செய்து தர நடவடிக்கை எடுக்கப்படும் என உறுதி அளித்ததையடுத்து, உதவி பொறியாளரை விடுவித்து, கிராம மக்கள் கலைந்து சென்றனா். போராட்டத்தால் சுமாா் ஒரு மணி நேரம் போக்குவரத்து பாதிக்கப்பட்டது.