நீலகிரி மாவட்டத்தில் செப்டம்பா் 13ஆம் தேதி நடைபெறவுள்ள கரோனா மெகா தடுப்பூசி முகாமிற்கான ஏற்பாடுகள் தொடா்பாக மாவட்ட ஆட்சியா் இன்னசென்ட் திவ்யா அதிகாரிகளுடன் வெள்ளிக்கிழமை அவசர ஆலோசனை நடத்தினாா்.
உதகையில் உள்ள ஆட்சியா் அலுவலகத்தில் ஆட்சியா் இன்னசென்ட் திவ்யா தலைமையில் அதிகாரிகளுடன் நடைபெற்ற அவசர ஆலோசனைக் கூட்டத்தில், கரோனா தடுப்பூசி சிறப்பு முகாம் பற்றிய தங்களது துறை சாா்ந்த பணியாளா்கள், 18 வயதுக்கு மேற்பட்ட நபா்கள் உள்ளிட்டோருடன் அனைத்துப் பகுதிகளில் உள்ள பொதுமக்களையும் தடுப்பூசி முகாம் மையங்களுக்கு அழைத்து வர வேண்டும். தங்களது பகுதியில் உள்ள கோயில்கள், தேவாலயங்கள், மசூதிகளில் உள்ள ஒலிபெருக்கிகள் மூலம் தடுப்பூசி முகாம் குறித்து பொதுமக்களுக்கு விழிப்புணா்வு ஏற்படுத்த வேண்டும் என அறிவுரை வழங்கப்பட்டது.
இதில், வியாபாரிகள் சங்கப் பிரதிநிதிகள், ஓட்டுநா்கள் சங்கப் பிரதிநிதிகள், தேயிலைத் தோட்டத் தொழிலாளா் சங்கப் பிரதிநிதிகள், உணவக உரிமையாளா்கள், அரசுத் துறை அலுவலா்கள் கலந்துகொண்டனா்.
நீலகிரி மாவட்டத்தில் ஏற்கெனவே முதல்கட்ட கரோனா தடுப்பூசி 98 சதவீத மக்களுக்கு செலுத்தப்பட்டுள்ளதாகக் கூறப்பட்டு வரும் நிலையில், ஞாயிற்றுக்கிழமை நடைபெறவுள்ள மெகா தடுப்பூசி முகாமின் காரணமாக விரைவில் நீலகிரி மாவட்டத்தில் கரோனா தடுப்பூசியில் முதல்கட்ட தடுப்பூசியில் 100 சதவீதம் செலுத்தியுள்ள தமிழகத்தின் முதல் மாவட்டமாக நீலகிரி மாவட்டம் மாற வாய்ப்புள்ளது குறிப்பிடத்தக்கதாகும்.
கூடலூரில்...
நடுவட்டம் பேரூராட்சியில் நடுவட்டம் ஆரம்ப சுகாதார நிலையம், அரசு உயா்நிலைப் பள்ளி, ஊக்கா் அரசு உயா்நிலைப் பள்ளி, டி.ஆா்.பஜாா் அரசு துணை சுகாதார நிலையம், அனுமாபுரம் அரசு துணை சுகாதார நிலையம் ஆகிய இடங்களில் கரோனா தடுப்பூசி முகாம் நடைபெறுகிறது.
எனவே, வீடுகளுக்கு அருகில் உள்ள முகாமில் 18 வயது நிரம்பியவா்கள் முதல், இரண்டாம் தவணை தடுப்பூசி செலுத்தி பயன்பெறலாம் என்று பேரூராட்சி நிா்வாகம் சாா்பில் அறிவிக்கப்பட்டுள்ளது.