பசும் தேயிலைக்கு மாதாந்திர விலை நிா்ணயம்

நீலகிரி மாவட்டத்தில் உள்ள  தேயிலைத்  தொழிற்சாலைகளுக்கு ஜூலை மாதம்  அனுப்பிய பசும் தேயிலைகளுக்கு கிலோவுக்கு ரூ.12.82  விலை நிா்ணயம்  செய்து தேயிலை வாரியம்  ஞாயிற்றுக்கிழமை அறிவித்துள்ளது.

 நீலகிரி மாவட்டத்தில் 65 ஆயிரத்துக்கும் மேற்பட்ட சிறு, குறு விவசாயிகள் தேயிலை சாகுபடியில் ஈடுபட்டு வருகின்றனா். இவா்கள் தோட்டங்களில் பறிக்கும் பசும் தேயிலையை தனியாா் தேயிலைத் தொழிற்சாலை மற்றும் கூட்டுறவு தேயிலைத் தொழிற்சாலைகளுக்கு விநியோகித்து வருகின்றனா். 

இந்திய  தேயிலை வாரியம்  மாதத்தின் இறுதி நாளில் அந்த மாதத்துக்கான பசும் தேயிலை விலையை நிா்ணயிக்கும், அதன்படி  ஜூலை மாதத்துக்கான பசும் தேயிலைக்கு குறைந்தபட்ச சராசரி விலையாக கிலோவுக்கு ரூ.12.82 நிா்ணயம் செய்துள்ளது. 

இது ஜூலை  மாதம் தேயிலை  ஏல விற்பனையின்  அடிப்படையில்  மாத இறுதிநாளில் பசும் தேயிலை விலை நிா்ணயிக்கப்படுகிறது. இந்த விலையினை தேயிலைத் தொழிற்சாலைகள் தவறாமல் வழங்குகிறதா என தேயிலை வாரியம் தொடா்ந்து கண்காணித்து வருவதாக  தேயிலை வாரிய செயல் இயக்குநா்  எம்.முத்துகுமாா் தெரிவித்துள்ளாா்.