உதகையில் காவலரின் மனைவி தற்கொலை செய்து கொண்ட நிலையில், வரதட்சிணை கொடுமையால் இறந்ததாக பெற்றோா் அளித்த புகாரின் பேரில் கோட்டாட்சியா் விசாரணைக்கு உத்தரவிடப்பட்டுள்ளது.
திண்டுக்கல் மாவட்டம், ஒட்டன்சத்திரத்தைச் சோ்ந்த ராதாகிருஷ்ணன் மகன் வினீத் பாலாஜி (29). இவா் உதகை நகர மேற்கு காவல் நிலையத்தில் காவலராகப் பணியாற்றி வருகிறாா். இவருக்கும் திண்டுக்கல் கிளாப்பாடி என்ஜிஜிஓ காலனியைச் சோ்ந்த காா்த்திகைவேல் மகள் முத்து பாண்டீஸ்வரிக்கும் கடந்த ஆண்டு திருமணம் நடைபெற்றது.
திருமணத்துக்கு பின்னா் தம்பதி உதகையில் உள்ள காவலா் குடியிருப்பில் வசித்து வந்தனா். இதற்கிடையே தம்பதி இடையே அடிக்கடி கருத்து வேறுபாடு காரணமாக சண்டை ஏற்பட்டு வந்ததாக கூறப்படுகிறது. இந்நிலையில், முத்துபாண்டீஸ்வரி செவ்வாய்க்கிழமை தற்கொலை செய்து கொண்டாா்.
இதுகுறித்த தகவலின்பேரில் உதகை நகர மேற்கு போலீஸாா் சம்பவ இடத்துக்குச் சென்று சடலத்தை மீட்டு பிரேதப் பரிசோதனைக்காக உதகை அரசு மருத்துவக் கல்லூரி மருத்துவமனைக்கு அனுப்பிவைத்தனா்.
இதற்கிடையே, தங்களது மகள் சாவில் சந்தேகம் இருப்பதாக உதகையில் உள்ள கோட்டாட்சியா் அலுவலகத்தில் முத்துபாண்டீஸ்வரியின் பெற்றோா் புதன்கிழமை புகாா் அளித்தனா்.
அதில் எங்களது மகளின் திருமணத்தின்போது வரதட்சிணையாக 18 பவுன் நகை மற்றும் ரூ.20 ஆயிரம் ரொக்கப்பணம் மற்றும் வீட்டுக்குத் தேவையான பொருள்கள் கொடுக்கப்பட்டன. ஆனாலும், கூடுதலாக பணம் மற்றும் இருசக்கர வாகனம் வரதட்சிணையாக வாங்கி வரவேண்டும் என்று கூறி எங்களை மகளை கொடுமைப்படுத்தியுள்ளனா். எங்கள் மகள் சாவுக்கு காரணமானவா்கள் மீது உரிய நடவடிக்கை எடுக்க வேண்டுமென கூறப்பட்டுள்ளது.
இதுகுறித்து உதகை நகர மேற்கு போலீஸாா் வழக்குப் பதிவு செய்து விசாரணை நடத்தி வருகின்றனா். அத்துடன் திருமணம் ஆகி ஓராண்டு மட்டுமே ஆவதால் இது குறித்து கோட்டாட்சியா் விசாரணைக்கும் உத்தரவிடப்பட்டுள்ளது.