சாதிப்பதற்கு ஊனம் ஒரு தடையே இல்லைதசை சிதைவு நோயால் அவதியுறும் இளைஞரின் விடாமுயற்சி

குன்னூரில் மாற்றுத்திறனாளிகள் வரைந்த ஓவியக் கண்காட்சியில், தசை சிதைவு நோயால் பாதிக்கப்பட்ட இளைஞா் வரைந்த 30 ஓவியங்கள், பாா்வையாளா்களை வெகுவாக கவா்ந்தது.

மலைகளின் அரசி என அழைக்கப்படும் மலை மாவட்டமான நீலகிரி மாவட்டத்தில் குன்னூரில் உள்ள பிராவிடன்ஸ் பெண்கள் கல்லூரி அரங்கில் ஆா்ட் பவுண்டேஷன் அமைப்பின் சாா்பில் மாற்றுத்திறனாளி மாணவா்கள் வரைந்த ஓவியக் கண்காட்சி நடைபெற்றது. இந்த கண்காட்சியில் பத்தாம் வகுப்பு படித்த இளைஞா் காா்த்திகேயன்(23) அவருக்கு தசை சிதைவு நோயால் பாதிக்கப்பட்டு வீட்டில் இருந்தபடியே சிகிச்சை பெற்று வருகிறாா். பத்தாம் வகுப்பு வரை படித்த அவருக்கு அந்நோயின் தாக்கம் அதிகரித்ததால் தனது பள்ளிப்படிப்பை அவரால் தொடர முடியவில்லை.

அப்போது பா்வத் நீலகிரிஸ் என்ற தனியாா் தொண்டு நிறுவனத்தின் சாா்பில் அதன் நிறுவனா் ஷோபா என்ற பெண் ஒருவா் நோயால் பாதிக்கப்பட்ட அந்த மாணவனுக்கு மருத்துவ சிகிச்சை அளிக்க தேவையான அனைத்து வசதிகளையும் ஏற்படுத்திக் கொடுத்ததுடன், அந்த மாணவன் ஓவியம் வரைவதில் அதிக ஆா்வம் கொண்டிருந்ததால் அவரை ஓவியம் வரைவதற்கு அதிக ஊக்கமும் அளித்துள்ளாா். அந்த ஊக்கத்தின் காரணமாக தசை சிதைவு நோயால் பாதிக்கப்பட்ட காா்த்திகேயன் கடந்த மூன்றரை ஆண்டுகளில் 30 படங்களை தத்ரூபமாக வரைந்துள்ளாா். குறிப்பாக அவருக்கு சிறு வயது முதல் காா் மீது அதிகம் விருப்பம் இருந்தால் 20க்கும் மேற்பட்ட காா் படங்களையும், கிரிக்கெட் வீரா் தோனி, நடிகா்கள் விஜய், சூா்யா, மிஸ்டா் பீன் உள்ளிட்டோரின் படங்களையும் ஓவியமாக வரைந்துள்ளதோடு, தனக்கு ஊக்கமளித்த தனியாா் தொண்டு நிறுவனா் ஷோபாவின் உருவத்தையும் தத்ரூபமாக வரைந்து அவருக்கு பரிசாக வழங்கியுள்ளாா்.

தன்னால் நடக்க முடியவில்லை என்றாலும், தனது இரு கைகளில் உள்ள விரல்களில் பல்வேறு பிரச்னைகள் இருந்தாலும் திறமையை வெளிப்படுத்த ஊனம் ஒரு குறையில்லை என்பதை காா்த்திகேயன் மூன்றரை ஆண்டுகளில் 30 படங்களை வரைந்து சாதனை படைத்துள்ளாா். இதைத்தொடா்ந்து உதகை மலா் கண்காட்சியை திறந்து வைக்க உதகைக்கு வர உள்ள தமிழக முதல்வா் மு.க. ஸ்டாலினுக்கு பரிசாக வழங்கிட ஸ்டாலின் படத்தையும் காா்த்திகேயன் வரையத் துவங்கி உள்ளாா். உள்ளம் நன்றாக இருந்தால் ஊனம் ஒரு குறையில்லை என்ற பாடல் வரிகளுக்கேற்ப காா்த்திகேயனின் இந்த ஓவியக் கண்காட்சி அமைந்திருந்தது.

இதுதொடா்பாக இந்நிகழ்ச்சியின் ஏற்பாட்டாளா் நித்தின் கூறுகையில், ஆா்ட் மாரத்தான் என்ற பெயரில் நடத்தப்பட்ட இந்த கண்காட்சி பள்ளி மாணவா்களுக்கென நடத்தப்பட்டதாகவும், அதில் மாற்றுத்திறனாளிகளும் பங்கேற்கும் வகையில் உரிய வாய்ப்பினை ஏற்படுத்திக் கொடுத்ததாகவும் தெரிவித்ததோடு, காா்த்திகேயனின் கனவை விரைவில் நிறைவேற்ற இருப்பதாகவும் தெரிவித்தாா்.