திருப்பதி லட்டில் கலப்படம்: தவறு செய்தவா்கள் யாராக இருந்தாலும் தண்டனை வழங்க வேண்டும் -தமிழிசை செளந்தரராஜன்

திருப்பதி லட்டில் மாட்டுக் கொழுப்பு கலந்துள்ளதாக தகவல் வெளியாகி இருக்கும் நிலையில், இதில் தவறு செய்தது யாராக இருந்தாலும் கடும் தண்டனை வழங்கப்பட வேண்டும் என்று பாஜக மூத்த தலைவா் தமிழிசை செளந்தரராஜன் தெரிவித்தாா்.

நீலகிரி மாவட்டம், கோத்தகிரி பகுதியில் பாஜக சாா்பில் உறுப்பினா் சோ்க்கை நிகழ்ச்சி வெள்ளிக்கிழமை நடைபெற்றது.

இதில் சிறப்பு விருந்தினராக பங்கேற்ற பாஜக மூத்த தலைவா் தமிழிசை சௌந்தரராஜன் செய்தியாளா்களிடம் கூறியதாவது:

திருப்பதி லட்டில் மாட்டுக் கொழுப்பு கலந்துள்ள விவகாரத்தில் ஊழல் நடந்துள்ளது. இதில் தவறு செய்தவா்கள் யாராக இருந்தாலும் கடுமையான தண்டனை வழங்கப்பட வேண்டும். தமிழ்நாட்டில் உள்ள கோயில் சொத்துக்களை கையகப்படுத்துவதில் அரசு பாரபட்சம் காட்டுகிறது. சிறுபான்மையினா் வழிபாட்டு தலங்களில் வரும் வருமானம் அவா்களுக்காகவே செலவு செய்யப்படுகிறது. ஆனால் ஹிந்து கோயில் வருமானம் அந்த கோயிலுக்குகூட செலவு செய்வதில்லை.

முதல்வா் மு.க.ஸ்டாலின் வெளிநாட்டுக்கு சென்றபோது நிா்வாகத்தை உதயநிதி சிறப்பாக நடத்தினாா் என்று சொல்கிறாா்கள். இது ஜனநாயகமா என்ற கேள்வி எழுகிறது. தமிழக வெற்றிக்கழகத் தலைவா் விஜய் எந்த கொள்கையை முன்னெடுத்துச் செல்கிறாா் என்று சொல்லட்டும். தற்போது வரை அவா் திராவிட சாயத்தையே பூசிக் கொண்டுள்ளாா். விநாயகா் சதுா்த்திக்கு வாழ்த்து தெரிவிக்கவில்லை. அதேநேரத்தில் பெரியாா் சிலைக்கு மாலை அணிவித்துள்ளாா். நீட் தோ்வுக்கு எதிா்ப்பு தெரிவிக்கிறாா், இருமொழி கொள்கைக்கு ஆதரவு தெரிவிக்கிறாா். திமுக பாதையில்தான் அவா் செல்கிறாா். தமிழ்நாட்டில் குழந்தைகள் மற்ற மொழிகளை கற்றுக்கொள்ள கூடாது என்பது நியாயமல்ல என்றாா்.

இந்நிகழ்ச்சியில் நீலகிரி மாவட்ட பாஜக தலைவா் மோகன்ராஜ் உள்ளிட்ட பலா் கலந்து கொண்டனா்.