இரும்புக் குழாய் விழுந்து தொழிலாளி உயிரிழப்பு

உதகை அருகே புதை சாக்கடைப் பணியின்போது இரும்புக் குழாய் விழுந்து படுகாயம் அடைந்த தொழிலாளி சனிக்கிழமை உயிரிழந்தாா்.

நீலகிரி மாவட்டம், குன்னூரை அடுத்த சேலாஸ் கரும்பாலம் வாணி விலாஸ் பகுதியைச் சோ்ந்தவா் ஆறுமுகம். இவரது மகன் கருணா (21). இவா் அந்தப் பகுதியில் கூலித் தொழிலாளியாகப் பணியாற்றி வந்தாா்.

இந்தநிலையில், அதிகரட்டி பஞ்சாயத்துக்கு உள்பட்ட கேத்தி பாலாடா பகுதியில் 10 நாள்களாக புதை சாக்கடை அமைக்கும் பணிகள் தீவிரமாக நடைபெற்று வருகின்றன.

கருணா உள்பட பத்து போ் இந்தப் பணியில் கடந்த வியாழக்கிழமை ஈடுபட்டிருந்தனா். கருணா மற்றும் நான்கு போ் சோ்ந்து சுமாா் 300 கிலோ எடையுள்ள இரும்புக் குழாயைத் தூக்கியபோது மற்றவா்களுக்கு கைநழுவியதால் கருணா மீது இரும்புக் குழாய் விழுந்தது. இதில் படுகாயம் அடைந்த அவா் மயங்கி விழுந்தாா்.

இதைத் தொடா்ந்து, அவருடன் பணியாற்றியவா்கள் உடனடியாக குழாயை அகற்றி அவரை உதகை அரசு மருத்துவமனையில் அனுமதித்தனா். பின்னா், அவா் மேல்சிகிச்சைக்காக கோவை அரசு மருத்துவமனைக்கு கொண்டு செல்லப்பட்டாா். அங்கு சிகிச்சை பலனின்றி அவா் சனிக்கிழமை உயிரிழந்தாா். இதைத் தொடா்ந்து உடற்கூறாய்வுக்குப் பின்னா் அவரது உடல் உறவினா்களிடம் ஒப்படைக்கப்பட்டது.

இதுகுறித்து லவ்டேல் காவல் உதவி ஆய்வாளா் ரமேஷ்பாபு தலைமையிலான போலீஸாா் விசாரணை நடத்தி குன்னூா் கரன்சி பகுதியைச் சோ்ந்த ஒப்பந்ததாரா் ஈஸ்வரன் மீது வழக்குப் பதிவு செய்து விசாரணை நடத்தி வருகின்றனா்.