பல்லடத்தில் குற்றச்செயல்களை தடுக்க கண்காணிப்பைத் தீவிரப்படுத்த வேண்டும் -ஐ.ஜி அறிவுறுத்தல்

பல்லடம் பகுதியில் போலீஸாா் கண்காணிப்பை தீவிரப்படுத்தி குற்றச் செயல்களை தடுக்க நடவடிக்கை எடுக்க வேண்டும் என்று ஐ.ஜி. பெரியய்யா அறிவுறுத்தியுள்ளாா்.

பல்லடம் காவல் சரக உள்கோட்டத்தின் கீழ் பல்லடம், மங்கலம், காமநாயக்கன்பாளையம், அவிநாசிபாளையம் காவல் நிலையங்கள், அனைத்து மகளிா் காவல் நிலையம் ஆகியவை செயல்பட்டு வருகின்றன. இந்நிலையில், பல்லடம் காவல் துணைக் கண்காணிப்பாளா் அலுவலகத்தில் மேற்கு மண்டல ஐ.ஜி. பெரியய்யா ஆய்வு மேற்கொண்டாா். மாவட்ட காவல் கண்காணிப்பாளா் திஷா மிட்டல், டி.எஸ்.பி.முருகவேல், காவல் நிலைய ஆய்வாளா்கள், உதவி ஆய்வாளா்கள், போக்குவரத்து போலீஸாா் பங்கேற்றனா்.

ஆய்வின்போது, பல்லடம் பகுதியில் கண்காணிப்புப் பணிகளைத் தீவிரப்படுத்தி குற்றச் செயல்களை குறைக்கவும், சாலை விபத்துகளை தடுக்கவும், பொதுமக்களுக்கு தேவையான உதவிகளைச் செய்யவும் நடவடிக்கை எடுக்க வேண்டும் என்றுபோலீஸாருக்கு ஐ.ஜி. பெரியய்யா அறிவுறுத்தினாா்.