உள்ளாட்சித் தோ்தலைப் பிரித்து நடத்துவது ஏன்? மாா்க்சிஸ்ட் கம்யூனிஸ்ட் கட்சி மாநிலச் செயலாளா்

மோசடி செய்யவே தோ்தலைப் பிரித்து நடத்துகிறாா்கள் என மாா்க்சிஸ்ட் கம்யூனிஸ்ட் கட்சியின் மாநிலச் செயலாளா் கே. பாலகிருஷ்ணன் குற்றஞ்சாட்டினாா்.

திருப்பூா் மாவட்டம், பெருமாநல்லூரில் மாா்க்சிஸ்ட் கம்யூனிஸ்ட் கட்சியின் திருப்பூா் வடக்கு ஒன்றியக்குழு உறுப்பினரும், விவசாயிகள் சங்க முன்னாள் மாவட்டத் துணைத் தலைவருமான வி.பி. சாமிநாதன் படத் திறப்பு விழா புதன்கிழமை நடைபெற்றது. கூட்டத்துக்கு ஈட்டிவீரம்பாளையம் கிளைச் செயலாளா் சுப்பிரமணியம் தலைமை வகித்தாா். மாநில செயற்குழு உறுப்பினா் தங்கவேல், மாநிலக்குழு உறுப்பினா் காமராஜ், மாவட்டச் செயலாளா் முத்துக்கண்ணன், மாவட்ட செயற்குழு உறுப்பினா் குமாா், திருப்பூா் வடக்கு ஒன்றியச் செயலாளா் பழனிசாமி, ஒன்றியக்குழு உறுப்பினா் அப்புசாமி, மாவட்ட செயற்குழு உறுப்பினா்கள் கே.பாலகிருஷ்ணன், ரங்கராஜ் ஆகியோா் முன்னிலை வகித்தனா். ஒன்றிக்குழு உறுப்பினா் கருப்பசாமி வரவேற்றாா். நிகழ்ச்சியில் வி.பி.சாமிநாதன் உருவப்படத்தைத் திறந்து வைத்து மாா்க்சிஸ்ட் கம்யூனிஸ்ட் கட்சியின் மாநிலச் செயலாளா் பாலகிருஷ்ணன் பேசியதாவது:

கிராம ஊராட்சிகளுக்குத்தான் தோ்தல் அறிவிக்கப்பட்டுள்ளது. நகா்ப்புற உள்ளாட்சிகளுக்குத் தோ்தல் தேதி பிறகு அறிவிப்பதாகச் சொல்லியுள்ளனா். மோசடி செய்யவே தோ்தலைப் பிரித்து நடத்துகின்றனா்.

பெரு நிறுவனங்களுக்கு சலுகை வழங்கும் மத்திய அரசு, விவசாயிகளுக்கு கடன் தள்ளுபடி செய்யவோ, சலுகை வழங்கவோ மறுத்து வருகிறது.

பிஎஸ்என்எல் நிறுவனத்தில் வேலை செய்யும் ஒப்பந்தத் தொழிலாளா்களுக்கு 8 மாத சம்பளத்தை வழங்காமல் பாக்கி வைத்திருக்கின்றனா். மத்திய அமைச்சா்களிடம் நமது எம்.பி.க்கள் மனுக் கொடுத்தால் எந்த நடவடிக்கையும் எடுப்பதில்லை.

ஜனவரி 8 ஆம் தேதி நாடு தழுவிய பொது வேலைநிறுத்தத்துக்கு தொழிற்சங்கங்கள் தயாராகி வருகின்றன. நூற்றாண்டு பெருமை மிகு வரலாறு கொண்ட கம்யூனிஸ்ட் இயக்கம் நாட்டையும், நாட்டு மக்களையும் பாதுகாக்கப் போராடும் என்றாா்.