திருப்பூா் அருகே கள்ள நோட்டு வழக்கில் மேலும் ஒருவா் கைது

திருப்பூா் மாவட்டம், பல்லடம், மகாலட்சுமி நகரில் கள்ள நோட்டு வழக்கில் மேலும் ஒருவா் செவ்வாய்க்கிழமை கைது செய்யப்பட்டாா்.

திருவாரூா் மாவட்டம், மன்னாா்குடியைச் சோ்ந்த வேதைய தேவா் மகன் நாகேந்திரன் (63). இவா், பல்லடம், மகாலட்சுமி நகரில் வசித்துக் கொண்டு அதே பகுதியில் உள்ள தனியாா் நிறுவனத்தில் காவலாளியாகப் பணியாற்றி வந்துள்ளாா். மகாலட்சுமி நகரில் உள்ள மளிகைக் கடையில் அரிசி சிப்பம் திங்கள்கிழமை வாங்கிவிட்டு ரூ. 2 ஆயிரம் நோட்டை கொடுத்துள்ளாா். அந்த நோட்டை சோதித்த கடைக்காரருக்கு அது கள்ள நோட்டு என்று தெரியவந்தது. நாகேந்திரனைப் பிடித்து பல்லடம் போலீஸில் மளிகைக் கடைக்காரா் ஒப்படைத்துள்ளாா். விசாரணையில், தன்னுடன் பணியாற்றி வந்த மாதவன் என்பவா் ரூ. 2ஆயிரம் கள்ள நோட்டை மாற்றித் தந்தால் ரூ. 300 கமிஷன் தருவதாக ஆசை வாா்த்தை கூறியதை நம்பி இதுவரை ரூ.15 ஆயிரத்துக்கு மேல் கள்ள நோட்டுக்களை புழக்கத்தில் நாகேந்திரன் விட்டுள்ளாா் என்பது தெரியவந்தது. அதைத் தொடா்ந்து நாகேந்திரனை போலீஸாா் கைது செய்தனா்.

மேலும் இதுதொடா்பாக மகாலட்சுமி நகரில் ஒரு வீட்டில் பதுங்கி இருந்த மாதவனை (28) போலீஸாா் செவ்வாய்க்கிழமை கைது செய்தனா். விசாரணையில் அவா், திருவாரூா் மாவட்டம், மன்னாா்குடி அருகில் உள்ள திருமாகோட்டையைச் சோ்ந்த ராஜேந்திரன் மகன் என்பதும், கள்ள நோட்டுகளை மாற்றி வருவதும் தெரியவந்தது. இதுகுறித்து போலீஸாா் தீவிர விசாரணை மேற்கொண்டுள்ளனா்.