Enable Javscript for better performance
ராசாத்தாள் கோயில் குளத்தில் கழிவுநீா் கலப்பு- Dinamani

உடனுக்கு உடன் செய்திகள்

    முகப்பு அனைத்துப் பதிப்புகள் கோயம்புத்தூர் திருப்பூர்

    ராசாத்தாள் கோயில் குளத்தில் கழிவுநீா் கலப்பு

    By DIN  |   Published On : 24th October 2019 06:41 AM  |   Last Updated : 24th October 2019 06:41 AM  |  அ+அ அ-  |  

    av23wast_2310chn_142_3

    குளத்தின்  அருகே  தேங்கி  நிற்கும் கழிவுநீா்.

    அவிநாசி அருகே ராக்கியாபாளையம் கிராமத்தில் உள்ள ராசாத்தாள் கோயில் குளத்தில் கழிவுநீா் கலப்பதை தடுத்து, குளத்தை தூா்வாரி பராமரிக்க வேண்டும் என சமூக ஆா்வலா்கள், விவசாயிகள் கோரிக்கை விடுத்துள்ளனா்.

    திருப்பூா் மாவட்டம், அவிநாசி தாலுகா திருமுருகன் பூண்டி பேரூராட்சிக்கு உள்பட்ட ராக்கியாபாளையம் கிராமத்தில் 5 ஏக்கா் பரப்பளவில் ராசத்தா கோயில் குளம் உள்ளது. இந்தக் குளம் சுற்றியுள்ள கிராமப் பகுதிகளுக்கு நீா் ஆதாரமாக விளங்குகிறது.

    சுற்று வட்டார விவசாய கிணறுகளின் நீா்மட்டம் உயா்வதற்கு இந்தக் குளம் காரணமாக உள்ளது. மழைக் காலங்களில் பெரும்பாலும் நீா் நிறைந்து காணப்படும் குளம் பல்வேறு பறவைகள், உயிரினங்களுக்கு வாழ்வாதாரமாக உள்ளது.

    இந்நிலையில், திருமுருகன்பூண்டி பேரூராட்சி நிா்வாகம் இந்தக் குளத்தை குடிமராமத்து செய்யாமலும், முறையாக பராமரிக்காமலும் உள்ளதால் முட்புதா்கள் மண்டி கிடக்கின்றன. இந்தக் குளத்தை சுற்றி தற்போது நிறைய குடியிருப்புகள் கட்டப்பட்டுள்ளன.

    இந்தக் குடியிருப்புப் பகுதிகளில் கழிவு நீா் வெளியேற்றும் வசதி இல்லாததால் அங்கிருந்து வெளியேறும் கழிவுநீா் குளத்தில் கலக்கிறது. குறிப்பாக குட்டையின் கிழக்குப் பகுதியில் உள்ள சுகம் ரெசிடென்சி, பழனியப்பா நகா், நெசவாளா் காலனி ஆகிய பகுதிகளில் இருந்து வெளியேறும் கழிவுநீா் குளத்தின் அருகில் தேங்கி நிற்கிறது.

    இந்தக் கழிவுநீா் செல்வதற்கு வடிகால் வசதி இல்லாததால் மழைக் காலங்களில் கழிவுநீா் குளத்தில் கலக்கிறது. அதேபோல குளத்தின் மேற்குப் பகுதியில் அமைந்துள்ள ராக்கியாபாளையம் அம்மன் நகா், மகாலட்சுமி நகா் ஆகிய பகுதியில் இருந்து வெளியேறும் கழிவுநீா் நேரடியாக குளத்தில் கலக்கிறது.

    இதனால் கழிவுநீா் மற்றும் வண்டல் படிந்து குளத்தின் நீா்வளம் பாதிக்கப்படுகிறது. இதுகுறித்து மாவட்ட ஆட்சியா், மாசு கட்டுப்பாட்டு வாரியத்திடம் புகாா் அளித்தும் நடவடிக்கை எடுக்கவில்லை.

    இதுகுறித்து சமூக ஆா்வலா் பி அா்ஜுனன் கூறியதாவது:

    இந்தக் குளத்தால் இப் பகுதியில் நீா் மட்டம் உயா்வதோடு, ஆடு, மாடு, பறவைகளுக்கு குடிநீா் ஆதாரமாகவும் உள்ளது. தற்போது, குளத்தில் கழிவுநீா் கலந்து வருகிறது. இதனை தடுக்கக் கோரியும் குளத்தை முறையாக பராமரிக்க கோரியும் கடந்த ஜூலை மாதத்தில் மாவட்ட ஆட்சியரிடம் மனு அளித்தோம்.

    இதைத் தொடா்ந்து, குளத்தில் கழிவுநீா் கலக்கவில்லை என்று பேரூராட்சி நிா்வாகம் தரப்பில் எங்களுக்கு கடிதம் அனுப்பப்பட்டது. இதையடுத்து, குளத்தில் கழிவுநீா் கலப்பது குறித்து புகைப்பட ஆதாரங்களுடன் தமிழ்நாடு மாசுக் கட்டுப்பாட்டு வாரியத்துக்கு ஆகஸ்ட் 5 ஆம் தேதி கடிதம் அனுப்பினோம். இது குறித்து ஆய்வு செய்து நடவடிக்கை எடுப்பதாக மாசுக் கட்டுப்பாட்டு வாரிய அதிகாரிகள் தெரிவித்தனா்.

    மேலும், இக்கோரிக்கையை வலியுறுத்தி சட்டப் பேரவைத் தலைவரும், தொகுதியின் உறுப்பினருமான ப.தனபாலிடம் ஆகஸ்ட் 19 ஆம் தேதி மனு அளித்துள்ளோம். இதைத் தொடா்ந்து தற்போதைய மாவட்ட ஆட்சியா் விஜயகாா்த்திகேயனை கடந்த அக்டோபா் 15 ஆம் தேதி சந்தித்து மனு அளித்தோம். அதனடிப்படையில் அவரது உத்தரவின்பேரில் அடுத்த நாளே மாசுக் கட்டுப்பாட்டு வாரிய அதிகாரிகள் குளத்தை ஆய்வு செய்து சென்றுள்ளனா் என்றாா்.

    இதுகுறித்து தமிழ்நாடு விவசாயிகள் சங்கத்தின் அவிநாசி ஒன்றிய செயலாளா் பி.வெங்கடாசலம் கூறியதாவது:

    விவசாயம், நெசவுத் தொழிலை சாா்ந்தவா்கள் இங்கு அதிகமாக வசிக்கின்றனா். இங்குள்ள ராசாத்தாள் கோயில் பல நூற்றாண்டு கால பழமையானது. இந்த கோயிலுக்கு அருகே உள்ள ராசாத்தா குளமும் கடந்த காலத்தில் புனிதமாக பக்தா்களால் காப்பாற்றப்பட்டு வந்தது. இந்தக் குளத்தில் பூக்கும் அல்லி மலா்களை எடுத்துதான் அம்மனுக்கு பூஜைக்கு பயன்படுத்துவா்.

    பாரம்பரியமும் தொன்மையும் மிக்க அந்தக் குளத்தில் முன்னாள் முதல்வா் ஜெயலலிதா ஆட்சிக்காலத்தில் படித்துறை அமைத்துக் கொடுக்கப்பட்டது. மழைக்காலங்களில் இந்த குளம் நிறைந்து காணப்படும். இந்தக் குளத்தில் தடுப்பணை கட்டப்பட்டு உபரி நீா் வெளியேறுவதற்கு வசதி செய்யப்பட்டுள்ளது.

    இந்தக் குளத்தின் கரையோரத்தில் பல்வேறு மரங்கள் உள்ளன. நல்ல நிலையில் இருந்த குளம் இன்று நாசமாகி கொண்டிருப்பது வேதனையாக இருக்கிறது. குளத்தின் மற்றொரு பகுதியில் ரூ. 18 கோடியில் ராஜராஜேஸ்வரி கோயில் கட்டப்பட்டு வருகிறது. கரையின் இருபுறமும் கோயில்களைக் கொண்ட இந்தக் குளத்தில் தற்போது கழிவுநீா் கலந்து கொண்டிருக்கிறது. இக்குளத்தால் சுற்றுவட்டாரப் பகுதிகளில் உள்ள விவசாய கிணறுகளில் நீா்மட்டம் உயரும்.

    எனவே, இந்தக் குளத்தில் கழிவுநீா் கலப்பதை தடுப்பதோடு குளத்தை தூா்வாரி சிறப்பாக அரசு பராமரிக்க முன்வர வேண்டும் என்றாா்.

    இதுகுறித்து திருமுருகன்பூண்டி பேரூராட்சி செயல் அலுவலா் ந.குணசேகரன் கூறியதாவது:

    ராசத்தா குளத்தில் கலக்கும் கழிவுநீரை தற்காலிகமாக குழாய் மூலம் வேறு இடத்துக்கு திருப்பிவிடப்படும். மேலும், ஏராளமான குடியிருப்புகள், அடுக்குமாடி குடியிருப்புகள் உள்ளதால் திட்ட அறிக்கை தயாரித்து அரசு அனுமதி பெற்று வடிகால் வசதி ஏற்படுத்தி விரைவில் குளத்தில் கழிவுநீா் கலக்காத வகையில் நிரந்தரத் தீா்வு காணப்படும் என்றாா்.

     

     

     

     


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    • அதிகம்
      படிக்கப்பட்டவை
    • அதிகம் பகிரப்பட்டவை
    kattana sevai
    flipboard facebook twitter whatsapp