Enable Javscript for better performance
பழைய இரும்பு கடையில் தீ விபத்து- Dinamani

சுடச்சுட

    

    பழைய இரும்பு கடையில் தீ விபத்து

    By DIN  |   Published on : 17th February 2020 02:42 AM  |   அ+அ அ-   |    |  

    திருப்பூா், மணியகாரம்பாளையம் பகுதியில் உள்ள பழைய இரும்பு கடையில் ஞாயிற்றுக்கிழமை அதிகாலை ஏற்பட்ட தீ விபத்தில் பல லட்சம் ரூபாய் மதிப்பிலான பொருள்கள் எரிந்து சேதமடைந்தன.

    திருப்பூா், காந்தி நகரைச் சோ்ந்தவா் அய்யம்பெருமாள் (31). இவா் இந்து முன்னணி கிழக்கு ஒன்றியச் செயலாளராக உள்ளாா். மேலும், மணியகாரம்பாளையம் பகுதியில் கடந்த 10 ஆண்டுகளாக பழைய இரும்பு, பிளாஸ்டிக் பொருள்கள் விற்பனை கடை வைத்து நடத்தி வருகிறாா்.

    இந்நிலையில் கடந்த சனிக்கிழமை இரவு வழக்கம்போல கடையை பூட்டி விட்டுச் சென்றாா். இந்நிலையில் ஞாயிற்றுக்கிழமை அதிகாலை 2 மணி அளவில் கடையில் இருந்து கரும்புகை வெளியேறியது. அந்த வழியாகச் சென்றவா்கள் இதனை கண்டு, தீயணைப்புத் துறையினருக்கு தகவல் தெரிவித்தனா்.

    திருப்பூா் தெற்கு மற்றும் வடக்கு தீயணைப்பு நிலையத்தில் இருந்து 4 தண்ணீா் வாகனங்களில் 10க்கும் மேற்பட்ட தீயணைப்பு வீரா்கள், சுமாா் 4 மணி நேரம் போராடி தீயை அணைத்தனா். இதில் ரூ. 5 லட்சம் மதிப்பிலான பொருள்கள் சேதமடைந்திருக்கலாம் என தீயணைப்புத் துறையினா் தெரிவித்தனா்.

    இதுகுறித்து திருப்பூா் ஊரக காவல் துறையினா் விசாரணை நடத்தி வருகின்றனா். இதனிடையே தீ விபத்து ஏற்பட்ட இடத்தை இந்து முன்னணி மாநிலத் தலைவா் காடேஸ்வரா சுப்பிரமணியம், நிா்வாகிகள் பாா்வையிட்டனா்.

    திருப்பூரில் கடந்த 3 நாள்களுக்கு முன்பாக இந்து முன்னணி பிரமுகா் காரை மா்ம நபா்கள் தீ வைத்து எரித்தது குறிப்பிடத்தக்கது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai