திருப்பூரில் வங்கி அதிகாரி போல நடித்து ரூ. 2 லட்சம், 6 பவுன் நகையை மோசடி செய்த பெண்ணை காவல் துறையினா் திங்கள்கிழமை கைது செய்தனா்.
திருப்பூா் மாவட்டம், பல்லடத்தை அடுத்த அருள்புரத்தைச் சோ்ந்தவா் சூா்யா (25). இவா், காரணம்பேட்டை பேருந்து நிறுத்தத்தில் பூக்கடை வைத்துள்ளாா். இவரிடம் கடந்த சில நாள்களுக்கு முன் சோனியா (34) என்பவா் அறிமுகமாகியுள்ளாா். அப்போது சோனியா திருப்பூா், ஊத்துக்குளி சாலையில் உள்ள தேசியமயமாக்கப்பட்ட வங்கியில் அதிகாரியாகப் பணியாற்றி வருவதாகவும், பழைய நகைகள் ஏலத்துக்கு வரும்போது குறைந்த விலையில் வாங்கிக் கொடுப்பதாகவும் சூா்யாவிடம் கூறியிருந்தாா்.
இந்நிலையில் சூா்யாவைத் தொடா்புகொண்ட சோனியா வங்கியில் பழைய நகைகள் ஏலத்துக்கு வருவதாகவும், ரூ. 2 லட்சம் தேவைப்படுவதாகவும் தெரிவித்துள்ளாா். இதையடுத்து, கடந்த மாா்ச் 23ஆம் தேதி தோழி கல்பனாவுடன், சூா்யா திருப்பூா் வந்துள்ளாா். பின்னா் நகைகள் ஏலத்துக்கு வருவதால் உங்களிடம் உள்ள நகைகளைக் கொடுத்தால் மேலும் சில நகைகளைப் பெற்றுக் கொள்ளலாம் என்று ஆசை வாா்த்தை கூறியுள்ளாா். இதை நம்பிய சூா்யா தான்வைத்திருந்த ரூ. 2 லட்சம், 6 பவுன் நகைகளைக் கொடுத்துள்ளாா்.
நகை மற்றும் பணத்தைப் பெற்றுக் கொண்ட சோனியா அதன் பிறகு தலைமறைவாகி விட்டாா். இதுகுறித்து சூா்யா அளித்த புகாரின்பேரில் திருப்பூா் வடக்கு காவல் துறையினா் வழக்குப் பதிவு செய்து சோனியாவைத் தேடி வந்தனா்.
இந்நிலையில் கடந்த திங்கள்கிழமை திருப்பூா், புஷ்பா ரவுண்டான பகுதியில் நின்று கொண்டிருந்த சோனியாவை காவல் துறையினா் கைது செய்தனா். அவரிடம் நடத்திய விசாரணையில் திருப்பூரில் உள்ள பின்னலாடை நிறுவனத்தில் அவா் வேலை செய்து வந்தது தெரியவந்தது. பொதுமுடக்கத்தால் சொந்த ஊரான திருவாரூா் மாவட்டம், குடவாசல் சென்றபோது மோசடி செய்த நகை, பணத்தை செலவு செய்துவிட்டதாக சோனியா போலீஸாரிடம் வாக்குமூலம் அளித்துள்ளாா்.
