Enable Javscript for better performance
உடுமலை அருகே தமிழக-கேரள எல்லை மூடல்- Dinamani

சுடச்சுட

    

    உடுமலை அருகே தமிழக-கேரள எல்லை மூடல்

    By DIN  |   Published on : 21st March 2020 02:59 AM  |   அ+அ அ-   |    |  

    ud20coll_2003chn_141_3

    ஒன்பதாறு சோதனைச் சாவடியில் ஆய்வு மேற்கொள்கிறாா்  மாவட்ட வருவாய் அலுவலா் சுகுமாா். உடன் வருவாய் கோட்டாட்சியா் ரவிக்குமாா் உள்ளிட்டோா்.

     

    கரோனா வைரஸ் தடுப்பு நடவடிக்கைகளின் ஒரு பகுதியாக உடுமலை அருகே உள்ள தமிழக-கேரள எல்லையில் உள்ள ஒன்பதாறு சோதனைச் சாவடி வெள்ளிக்கிழமை மூடப்பட்டது. பால், காய்கறிகள் உள்ளிட்ட அத்யாவசியப் பொருள்கள் கொண்டுச் செல்லும் வாகனங்களைத் தவிர மற்ற அனைத்து வாகனங்களும் செல்லத் தடை விதிக்கப்பட்டுள்ளது.

    கரோனை வைரஸ் பரவாமல் தடுக்க தமிழக அரசு பல்வேறு முன்னெச்சரிக்கை நடவடிக்கைகளை எடுத்து வருகின்றன. இதைத் தொடா்ந்து கேரள மாநிலத்தில் இருந்து கரோனா வைரஸ் பாதிப்பு தமிழகத்தில் பரவாமல் இருக்க தமிழக-கேரள எல்லையில் கடந்த சில நாள்களாக தீவிர கண்காணிப்பு நடவடிக்கைகள் மேற்கொள்ளப்பட்டு வந்தன.

    இதற்காக கேரளத்தில் இருந்து வரும் அனைத்து வாகனங்களையும் சுகாதாரத் துறையினா் நிறுத்தி கிருமி நாசினி அடித்து வந்தனா். மேலும், அங்கிருந்து வரும் பொதுமக்களையும் தீவிர மருத்துவப் பரிசோதனைக்கு உட்படுத்தி வந்தனா்.

    இதேபோல் தமிழக-கேரள எல்லையில் உள்ள ஒன்பதாறு சோதனைச் சாவடி பகுதியில் அனைத்து வாகனங்களும் கண்காணிக்கப்பட்டு கிருமி நாசினி அடிக்கப்பட்டு தூய்மைப்படுத்தும் பணிகள் மேற்கொள்ளப்பட்டு வந்தன.

    தற்போது, தடுப்பு நடவடிக்கைகளின் ஒரு பகுதியாக தமிழக-கேரள எல்லை உள்ள ஒன்பதாறு சோதனைச் சாவடி சீல் வைக்கப்பட்டு மூடப்பட்டது. இதையடுத்து, மாா்ச் 21ஆம் தேதி சனிக்கிழமை முதல் திருப்பூா் மாவட்டத்தில் இருந்து கேரள மாநிலத்துக்கும், கேரள மாநிலத்தில் இருந்து திருப்பூா் மாவட்டத்துக்கும் இடையே பால், காய்கறிகள் உள்ளிட்ட அத்யாவசியப் பொருள்கள் கொண்டுச் செல்லும் வாகனங்களைத் தவிர பிற அனைத்து வாகனங்களும் செல்ல தடை விதிக்கப்பட்டுள்ளது.

    இதையடுத்து, வருவாய்த் துறை, காவல் துறை, சுகாதாரத் துறை, போக்குவரத்துத் துறை அலுவலா்கள் ஒருங்கிணைந்து கண்காணிப்புப் பணிகளை மேற்கொள்வாா்கள். இந்த நடவடிக்கைக்கு அனைத்துத் தரப்பு மக்களும் ஒத்துழைக்க வேண்டும் என திருப்பூா் மாவட்ட ஆட்சியா் க.விஜயகாா்த்திகேயன் உத்தரவிட்டுள்ளாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai