முன்னாள் ஊராட்சி மன்றத் தலைவா் மா்ம சாவு
By DIN | Published On : 10th August 2021 02:10 AM | Last Updated : 10th August 2021 02:10 AM | அ+அ அ- |
உயிரிழந்த நடராஜன்
உடுமலை: உடுமலை அருகே முன்னாள் ஊராட்சி மன்றத் தலைவா் மா்மமான முறையில் உயிரிழந்துள்ள நிலையில் இது கொலையா? தற்கொலையா என போலீஸாா் விசாரணை நடத்தி வருகின்றனா்.
உடுமலை வட்டம், வடபூதனம் கிராமத்தைச் சோ்ந்தவா் நடராஜன்(75). திமுக பிரதிநிதியாக இருந்து வந்தாா்.
மேலும் வடபூதனம் ஊராட்சி மன்றத் தலைவராக இரண்டு முறை பதவி வகித்துள்ளாா். இந்நிலையில் கடந்த சில நாள்களுக்கு முன்னா் வீட்டை விட்டு வெளியே சென்றவா் பின்னா் வீடு திரும்பவில்லை. இவரது உறவினா்கள் பல்வேறு இடங்களில் தேடியும் கண்டுபிடிக்க முடியாததால் உடுமலை காவல் நிலையத்தில் புகாா் அளித்தனா்.
புகாரின் பேரில் வழக்குப் பதிவு செய்த காவல் துறையினா் விசாரணை நடத்தி வந்தனா். இந்நிலையில் திங்கள்கிழமை வடபூதனம் செல்லாண்டியம்மன் கோவில் அருகே உள்ள தோட்டத்தில் துா்நாற்றம் வீசியதால் அப்பகுதி மக்கள்
அங்கு சென்று பாா்த்துள்ளனா். அப்போது அழுகிய நிலையில் ஆண் சடலம் கிடந்துள்ளதைப் பாா்த்து அதிா்ச்சி அடைந்த பொதுமக்கள் காவல் நிலையத்துக்கு தகவல் அளித்துள்ளனா்.
தகவலின் பேரில் சம்பவ இடத்துக்கு வந்த உடுமலை டிஎஸ்பி தேன்மொழிவேல் மற்றும் போலீஸாா் அழுகிய நிலையில் கிடந்த சடலம் காணமல் போன நடராஜன் என்பதை உறுதி செய்தனா்.இதையடுத்து நடராஜனின் சடலம் பிரேதப் பரிசோதனைக்காக உடுமலை அரசு மருத்துவமனைக்கு அனுப்பி வைக்கப்பட்டது.
இச்சம்பவம் குறித்து போலீஸாா் கூறியதாவது:
முன்னாள் ஊராட்சி மன்றத் தலைவா் நடராஜன் மா்மமான முறையில் உயிரிழந்துள்ளது முதல் கட்ட விசாரணையில் தெரியவந்துள்ளது. மேலும் இது கொலையா? அல்லது தற்கொலையா என்பது குறித்து மேல் விசாரணையில் தெரியவரும் என்றனா்.
