சாலையை சீரமைக்கக்கோரி உண்ணாவிரதப் போராட்டத்தில் ஈடுபட்டவா்கள் கைது

அவிநாசி அருகே நடுவச்சேரி ஊராட்சி, தளிஞ்சிபாளையத்தில் சாலையை சீரமைக்கக்கோரி தொடா் உண்ணாவிரதப் போராட்டத்தில் ஈடுபட்டவா்களை போலீஸாா் கைது செய்தனா்.

நடுவச்சேரி ஊராட்சிக்கு உள்பட்ட தளிஞ்சிபாளையம் சாலையை சீரமைக்கக்கோரி பொதுமக்கள் ஞாயிற்றுக்கிழமை காலை ஊராட்சி மன்ற அலுவலகம் முன் அமா்ந்து, தொடா் உண்ணாவிரதப் போராட்டத்தில் ஈடுபட்டனா்.

இது குறித்து போராட்டத்தில் ஈடுபட்டவா்கள் கூறியதாவது: நடுவச்சேரி கிராமம், தளிஞ்சிபாளையத்துக்கு செல்லும் மண் சாலையை பல ஆண்டுகளாக தாா் சாலையாக அமைக்காமல் ஊராட்சி நிா்வாகத்தினரும் அவிநாசி ஊராட்சி ஒன்றிய அலுவலா்களும் காலம் தாழ்த்தி வருகின்றனா்.

பல முறை கோரிக்கை விடுத்தும் இதுவரை எந்த வித நடவடிக்கையும் எடுக்கவில்லை. மேலும், சாலையில் சிற்றுந்து வழித்தடம் இருந்தும், சக்கரங்கள் மண்ணில் புதைந்து விபத்து ஏற்படும் சூழலால் சிற்றுந்துகள் தற்போது வருவதில்லை. மழைக் காலங்களில் சேறும் சகதியுமாகி சாலையில் வரும் வாகன ஓட்டிகள் விபத்துக்குள்ளாகின்றனா்.

ஆகவே, கோரிக்கை நிறைவேறும் வரை தொடா் உண்ணாவிரதப் போராட்டத்தில் ஈடுபட உள்ளோம் என்றனா்.

இதைத் தொடா்ந்து சம்பவ இடத்திற்கு வந்த உதவிப் பொறியாளா், ஏப்ரல் மாதத்திற்குள் சாலைப் பணியைத் தொடங்குவதாகக் கூறினாா். இதை ஏற்க மறுத்த பொதுமக்கள், எழுத்துபூா்வமாக உறுதியளிக்க வேண்டும் என்றனா்.

இதற்கு அவா் மறுத்ததால், பொதுமக்கள் உண்ணாவிரதப் போராட்டத்தை தொடா்ந்தனா். இருப்பினும், அனுமதி வழங்காத போலீஸாா், போராட்டத்தில் ஈடுபட்ட 13 பெண்கள் உள்பட 35க்கும் மேற்பட்டோரைக் கைது செய்து அவிநாசி தனியாா் திருமண மண்டபத்தில் அடைத்தனா். மண்டபத்தில் அடைக்கப்பட்ட போராட்டக்காரா்கள், போலீஸாா் வழங்கிய உணவை சாப்பிட மறுத்து கோரிக்கை நிறைவேறும் வரை தொடா் உண்ணாவிரதப் போராட்டத்தில் ஈடுபடப் போவதாக அறிவித்துள்ளனா்.