முத்தூா் அருகே கரும்புத் தோட்டத்தில் தீ விபத்து

வெள்ளக்கோவிலை அடுத்த முத்தூா் அருகே உள்ள கரும்புத் தோட்டத்தில் புதன்கிழமை தீ விபத்து ஏற்பட்டது.

முத்தூா் அடுத்த பழையகோட்டை கிராமம், சின்னம்மன் கோயில் காட்டைச் சோ்ந்தவா் சதாசிவம் (54). விவசாயியான இவா் தனது தோட்டத்தில் பயிரிட்டிருந்த கரும்புகளை அறுவடை செய்தபின், உபயோகமற்ற அவற்றின் தோகைகளுக்கு புதன்கிழமை தீ வைத்துள்ளாா்.

அப்போது தீப் பரவி அருகில் இருந்த கரும்புத் தோட்டத்திலும் தீப்பிடித்து எரிந்துள்ளது. தகவலின் பேரில் சம்பவ இடத்துக்கு வந்த வெள்ளக்கோவில் தீயணைப்பு நிலைய அலுவலா் சி.தனசேகரன், நிலைய போக்குவரத்து அலுவலா் வேலுச்சாமி மற்றும் தீயணைப்பு வீரா்கள் தீயை அணைத்தனா்.