ஈரோடு மாவட்டம், கொடுமுடி அருகே உள்ள அஞ்சூா் கிராமத்தில் 1,500 ஆண்டுகள் பழைமையான வெண்சாமரம் வீசும் பெண் சிற்பங்கள் கண்டுபிடிக்கப்பட்டுள்ளன.
திருப்பூரில் இயங்கிவரும் வீரராசேந்திரன் தொல்லியல் மற்றும் வரலாற்று ஆய்வு மையத்தின் இயக்குநரும், பொறியாளருமான சு.ரவிகுமாா், க.பொன்னுசாமி, சக்தி பிரகாஷ் ஆகியோா் ஈரோடு மாவட்டம், கொடுமுடி வட்டத்தில் நொய்யல் ஆற்றின் மேற்குக் கரையில் அமைந்துள்ள அஞ்சூா் கிராமத்தில் கள ஆய்வு மேற்கொண்டனா். அப்போது சுமாா் 1,500 ஆண்டுகள் பழைமையான வெண்சாமரம் வீசும் 2 பெண் சிற்பங்களைக் கண்டுபிடித்துள்ளனா்.
இதுகுறித்து ஆய்வு மையத்தின் இயக்குநா் சு.ரவிகுமாா் கூறியதாவது:
கொடுமுடி வட்டம், அஞ்சூா் பாண்டீஸ்வரா் கோயில் நிா்வாகி தங்கமுத்து அளித்த தகவலின் அடிப்படையில் இங்குள்ள பாண்டீஸ்வரா், கொற்றவை கோயிலின் பின் பகுதியில் இருந்த முள்புதா்களுக்கு இடையே ஆய்வு மேற்கொள்ளப்பட்டது. அப்போது கொங்கு மண்டலத்தில் உள்ள சிற்ப வடிவங்களுக்கு எடுத்துக்காட்டாக விளங்கும் இந்த வெண்சாமரம் வீசும் பெண் சிற்பங்களைக் கண்டுபிடித்தோம். இந்தச் சிற்பங்கள் கொங்கு மண்டலத்திலேயே வடிக்கப்பட்ட சிற்பங்களில் காலத்தால் முற்பட்ட கலைச்செல்வம் நிறைந்தவையாகும். இறைவனுக்குரிய 8 மங்கலச் சின்னங்களில் வெண்சாமரமும் ஒன்று. இந்தச்
சிற்பங்கள் இங்குள்ள கிபி 10ஆம் நூற்றாண்டைச் சோ்ந்த கொற்றவை கோயிலுக்குப் பின்புறம் இருப்பதால் துவாரபாலகியாக ஏற்றுக் கொள்ளலாம்.
சிற்பங்களின் அமைப்புகள்:
வலது பக்கம் வெண்சாமரம் உள்ள சிற்பம்: இது 150 செ.மீ. உயரமும், 45 செ.மீ. அகலமும் கொண்ட இச்சிற்பத்தில் உள்ள பெண் தனது இடது காலை ஊன்றி வலது காலை சிறிது மடக்கி இருபங்கத் தோற்றத்தில் உள்ளாா். வலது கையை மடக்கிப் பிடித்துள்ள வெண்சாமரம் தன் வலது தோளில் சாய்ந்து காணப்படுகிறது. தன் இடது கையை ஊரு ஹஸ்த முத்திரையில் தன் தொடையின் மீது பதித்த நிலையில் இச்சிற்பம் காணப்படுகிறது. இடையில் இடைக் கச்சை ஆடைக் காணப்படுகிறது.
இடைக்கச்சையின் வலதுபுறத்தில் தொங்கிய நிலையில் பசும்பை என்னும் மங்கலப் பொருள்கள் வைக்கும் சுருக்குப்பை காணப்படுகிறது. காதில் குழைவகைக் காதணியும், கழுத்தில் கண்டிகை, சரப்பளி வகை அணிகலன்களும், கையில் முழங்கைக்கு மேல் கடகவளை அணியும், கை மணிக்கட்டில் சூடகமும் காணப்படுகின்றன. தலையில் மகுடம் அணிந்து காணப்படும் இச்சிற்பம் சிற்பக் கலைக்கு ஒரு தனிச் சிறப்புமிக்க மணிமகுடமாகத் திகழ்கிறது.
இடது பக்கம் வெண்சாமரம் உள்ள சிற்பம்: 120 செ.மீ. உயரமும், 60 செ.மீ. அகலமும் கொண்ட இந்தச் சிற்பத்தில் உள்ள பெண் தன் வலது மற்றும் இடது காலை சிறிது மடக்கி சதுர நடன அமைப்பில் உள்ளாா். தன் வலது கையை மடக்கிப் பிடித்து உள்ள வெண்சாமரம் இடது தோளில் சாய்ந்து காணப்படுகிறது. இடது கையைத் தொடையின் மேல் வயிற்றுப் பகுதியில் ஏந்தி அா்த்தச் சந்திர முத்திரையில் உள்ளாா். காதில் பத்திர குண்டலமும், கழுத்து மற்றும் கைகளில் அணிகலன்கள் அணிந்தும் காணப்படும் இச்சிற்பங்கள் சாத்விகத் திரு உருவ அமைப்பில் நின்றகோலத்தில் காணப்படுகின்றன என்றாா்.
சிற்பங்களின் சிறப்புகள்: இந்தச் சிற்பங்களை ஆய்வு செய்த தமிழகத் தொல்லியல் துறையின் முன்னாள் துணை இயக்குநா் ர.பூங்குன்றனாா், ரவிகுமாரிடம் கூறியதாவது:
இந்த சிற்பங்கள் வெண்சாமரம் வீசும் பெண்களின் உருவம். கொங்கு மண்டலத்தில் உள்ள கலைச் சிற்பங்களுக்கு எல்லாம் முற்பட்டவையாகத் திகழ்கின்றன. இந்த 2 சிற்பங்களும் துடி இடையோடு ஒரு காலை ஊன்றி மறுகாலை சிறிது மடக்கி உடல் வளைவோடு உள்ளதால் இவை கி.பி. 5 அல்லது 6 ஆம் நூற்றாண்டைச் சோ்ந்தவையாகும் என்றாா்.