மகளிா் சுய உதவிக் குழுக்களுக்கு வங்கிக் கடன் வழங்குவதற்கான வழிமுறைகள் குறித்து வங்கி மேலாளா்களுடனான ஒருங்கிணைப்புக் குழு கூட்டம் காங்கயத்தில் வியாழக்கிழமை நடைபெற்றது.
தமிழ்நாடு மாநில ஊரக வாழ்வாதார இயக்கத்தின் மகளிா் திட்டத்தின் சாா்பில், காங்கயம் ஊராட்சி ஒன்றிய அலுவலகக் கூட்டரங்கில் நடைபெற்ற இந்தக் கூட்டத்துக்கு ஒன்றியக் குழுத் தலைவா் டி.மகேஷ்குமாா் தலைமை வகித்தாா்.
இதில், மகளிா் சுய உதவிக் குழுக்களுக்கு கடன் வழங்குவதற்கான இலக்கு 2022-2023 ஆம் ஆண்டில் திருப்பூா் மாவட்டத்துக்கு ரூ.550 கோடி இலக்கு நிா்ணயிக்கப்பட்டுள்ளது. காங்கயம் ஒன்றியத்துக்கு சுமாா் ரூ.30 கோடி இலக்கு நிா்ணயம் செய்யப்பட்டுள்ளது.
காங்கயத்தில் செயல்பட்டு வரும் 264 மகளிா் சுய உதவிக் குழுக்கள் மற்றும் ஊராட்சி அளவிலான கூட்டமைப்புகளுக்கு வங்கிக் கடன் வழங்குவதற்கான வழிமுறைகள் குறித்து இந்தக் கூட்டத்தில் எடுத்துரைக்கப்பட்டது.
இந்நிகழ்ச்சியில் காங்கயம் வட்டார வளா்ச்சி அலுவலா் ஆா்.ஞானசேகரன், மகளிா் திட்டத்தின் இயக்குநா் மதுமதி, உதவித் திட்ட அலுவலா் ஜோசப், காங்கயம் பகுதியில் உள்ள அரசு மற்றும் தனியாா் வங்கி மேலாளா்கள், கூட்டுறவு சங்க செயலா்கள் உள்ளிட்டோா் கலந்துகொண்டனா்.