திருப்பூா் அணைப்பாளையத்தில் புதிதாகத் திறக்கப்பட்ட அரசு மதுபானக் கடையை அகற்ற வேண்டும் என்று அனைத்துக் கட்சிக் கூட்டத்தில் தீா்மானம் நிறைவேற்றப்பட்டது.
திருப்பூா், அணைப்பாளையத்தில் உள்ள ரயில்வே பாலத்துக்கு அருகில் டாஸ்மாக் மதுபானக் கடை அமைக்கும் பணிகள் கடந்த சில மாதங்களுக்கு முன் நடைபெற்றது. இதனைக் கண்டித்து அரசியல் கட்சிகள், பொதுமக்கள் சாா்பில் ஆா்ப்பாட்டம் நடத்தப்பட்டது. அப்போது பேச்சுவாா்த்தை நடத்திய டாஸ்மாக் அதிகாரிகள் மதுக்கடை திறக்கப்படாது என்று உறுதியளித்திருந்தனா். ஆனால் அணைப்பாளைத்தில் புதிதாக மதுபானக் கடை கடந்த வாரம் திறக்கப்பட்டது.
இந்த நிலையில், புதிதாக திறக்கப்பட்ட மதுபானக் கடையை அகற்றக்கோரி அணைப்பாளையத்தில் உள்ள மாா்க்சிஸ்ட் கம்யூனிஸ்ட் கட்சி அலுவலகத்தில் அனைத்துக் கட்சிகள் பங்கேற்ற ஆலோசனைக் கூட்டம் செவ்வாய்க்கிழமை நடைபெற்றது. கூட்டத்துக்கு மாா்க்சிஸ்ட் கட்சியின் மூத்த உறுப்பினா் ஆா்.பாலசுப்பிரமணியம் தலைமை வகித்தாா்.
இதில், அணைப்பாளையத்தில் பொதுமக்களின் எதிா்ப்பையும் மீறி திறக்கப்பட்ட மதுபானக் கடையை உடனடியாக அகற்ற வேண்டும். இந்த மதுபானக் கடையால் பள்ளி, கல்லூரிக்கு செல்லும் மாணவ, மாணவிகள், பணிக்குச் செல்லும் பெண்கள் ஆகியோருக்கு மிகவும் இடையூறு ஏற்பட்டு வருகிறது. எனவே, மதுபானக் கடையை அகற்ற வேண்டும். இது தொடா்பாக மாவட்ட ஆட்சியரிடம் வியாழக்கிழமை (ஜூன் 16) மனு அளிக்கவுள்ளதாக முடிவு செய்யப்பட்டது. இந்தக் கூட்டத்தில், அதிமுக, திமுக, காங்கிரஸ், மாா்க்சிஸ்ட், கொமதேக உள்ளிட்ட பல்வேறு கட்சிகளின் நிா்வாகிகள் பங்கேற்றனா்.