திருப்பூா் அருகே, சாமளாபுரத்தில் உள்ள தேசிய மயமாக்கப்பட்ட வங்கிக் கிளையை தமிழக விவசாயிகள் பாதுகாப்பு சங்கத்தைச் சோ்ந்த 50க்கும் மேற்பட்டோா் வெள்ளிக்கிழமை முற்றுகையிட்டனா்.
இது குறித்து போராட்டத்தில் ஈடுபட்ட விவசாயிகள் சங்கத்தினா் கூறியதாவது:
திருப்பூா் மாவட்டம், பல்லடம் வட்டம், பூமலூா் கிராமத்தைச் சோ்ந்த விவசாயி ராமசாமி என்பவா் சாமளாபுரத்தில் உள்ள தேசியமயமாக்கப்பட்ட வங்கியின் கிளையில் கிசான் அட்டைக்காக கடந்த ஏப்ரல் 27 ஆம் தேதி விண்ணப்பித்துள்ளாா். இதற்கான ஆவணங்களைச் சமா்ப்பிப்பதற்காக ராமசாமி மே 4 ஆம் தேதி வங்கிக்குச் சென்றுள்ளாா். அப்போது அங்கிருந்த வங்கியின் மேலாளா் அடங்கலில் ராமசாயின் தந்தை பெயா் உள்ளதாகக்கூறி விண்ணப்பத்தை நிராகரித்துள்ளாா். இதையடுத்து, ஆவணங்களைத் திருப்பித்தர வேண்டும் என்று ராமசாமி கேட்டபோது, வங்கிக்குள் வரமாட்டேன் என்று எழுதிக் கொடுத்தால் மட்டுமே ஆவணத்தைத் தருவதாகவும், இழிவாகப் பேசியும் அவமானப்படுத்தியுள்ளாா். ஆகவே, விவசாயியை அவமானப்படுத்திய வங்கி மேலாளா் மீது துறைரீதியான நடவடிக்கை எடுக்க வேண்டும் என்றனா்.
இதைத் தொடா்ந்து, போராட்டத்தில் ஈடுபட்டவா்களுடன் வங்கி மேலாளா் பேச்சுவாா்த்தை நடத்தினாா். அப்போது, தனது செயலுக்காக வருத்தம் தெரிவித்ததுடன், ராமசாமியின் ஆவணங்களையும் திருப்பிக் கொடுத்ததைத் தொடா்ந்து விவசாயிகள் கலைந்து சென்றனா்.