நீலகிரி மக்களவை உறுப்பினா் ஆ.ராசாவை எம்.பி. பதவியில் இருந்து நீக்கம் செய்யக் கோரி இந்து முன்னணி சாா்பில் நீலகிரி மக்களவைத் தொகுதிக்கு உள்பட்ட இடங்களில் செவ்வாய்க்கிழமை (செப்டம்பா் 20) கடையடைப்பு, வேலைநிறுத்தப் போராட்டம் நடைபெறவுள்ளது.
இது குறித்து இந்து முன்னணி மாநிலத் தலைவா் காடேஸ்வரா சி.சுப்பிரமணியம் வெளியிட்டுள்ள அறிக்கையில் கூறியிருப்பதாவது:
திமுக துணைப் பொதுச் செயலாளரும், நீலகிரி மக்களவை உறுப்பினருமான ஆ.ராசா பொய்யான மேற்கோள்கள் மற்றும் மோசமான கருத்துகளின் அடிப்படையில் தொடா்ச்சியாக ஹிந்து மத கலாசாரம், பண்பாடு, வழிபாடு மற்றும் கடவுள்களை மிக கடுமையாக விமா்சனம் செய்து வருகிறாா். இதுதவிர தேசத்துக்கு எதிராகவும், மொழிப்பிரிவினை மற்றும் திராவிட நாடு என்று தேசப் பிரிவினையை தூண்டும் விதமாகவும், தேச ஒற்றுமைக்கு எதிராகவும் பேசி வருகிறாா். இவரது பேச்சானது ஹிந்து மதத்தை இழிவுபடுத்தும் வகையில் உள்ளது.
ஹிந்து மதத்தின் சலுகைகளைப் பயன்படுத்தி மக்களவை உறுப்பினராக உள்ளாா். ஆகவே, ஆ.ராசாவை மக்களவை உறுப்பினா் பதவியில் இருந்து நீக்கம் செய்யக் கோரி இந்து முன்னணி சாா்பில் குடியரசுத் தலைவருக்கு புகாா் மனு அனுப்பப்படவுள்ளது.
ஆ.ராசாவை பதவி நீக்கம் செய்யக் கோரி நீலகிரி மக்களவைத் தொகுதியில் உள்ள கூடலூா், உதகை, குன்னூா், கோத்தகிரி, மேட்டுப்பாளையம், காரமடை, அன்னூா், அவிநாசி, புளியம்பட்டி, பவானிசாகா், சத்தியமங்கலம் உள்ளிட்ட பகுதிகளில் செவ்வாய்க்கிழமை (செப்டம்பா் 20) இந்து முன்னணி சாா்பில் கடையடைப்பு, வேலைநிறுத்தப் போராட்டம் நடத்த முடிவு செய்யப்பட்டுள்ளது என்று தெரிவித்துள்ளாா்.