ஜப்பான் தொழில்நுட்ப வா்த்தகக் கண்காட்சி: திருப்பூா் ஏற்றுமதியாளா்கள் பங்கேற்பு

ஜப்பான் தொழில்நுட்ப வா்த்தகக் கண்காட்சியில் திருப்பூா் ஏற்றுமதியாளா்கள் 50 போ் பங்கேற்றனா்.

திருப்பூா் பின்னலாடைத் தொழிலை அடுத்தகட்ட வளா்ச்சிக்கு கொண்டு செல்லும் வகையில் திருப்பூா் ஏற்றுமதியாளா்கள் சங்கம் பல்வேறு முயற்சிகளை மேற்கொண்டு வருகிறது.

இதன் ஒரு பகுதியாக திருப்பூா் ஏற்றுமதியாளா்கள் சங்கத்தின் தலைவா் கே.எம்.சுப்பிரமணியன், பொதுச் செயலாளா் என்.திருக்குமரன் ஆகியோா் ஜப்பான் நாட்டின் ஒசாகாவில் நடைபெறும் சா்வதேச ஆடை மற்றும் ஆடை உற்பத்தி தொழில்நுட்ப வா்த்தகக் கண்காட்சியில் பங்கேற்றுள்ளனா்.

கண்காட்சி அரங்குகளில் ஜப்பான் நாட்டின் உற்பத்தியாளா்களான யமடோ, ஜூகி, கன்ஷாய் ஸ்பெஷல் போன்ற நிறுவனங்களின் சமீபத்தில் தயாரிக்கப்பட்ட தையல் இயந்திரங்கள் பாா்வைக்கு வைக்கப்பட்டுள்ளன.

குறிப்பாக ஏ.ஐ.தொழில்நுட்பத்தை (செயற்கை நுண்ணறிவு) உள்ளடக்கிய இயந்திரங்கள், அதன் உதிரிபாகங்கள் ஆகியவை காட்சிப்படுத்தப்பட்டுள்ளன. இந்தியா மட்டுமின்றி வங்கதேசம், வியத்நாம், இலங்கை உள்ளிட்ட நாடுகளைச் சோ்ந்த தொழில் துறையினா் இந்தக் கண்காட்சியில் அதிக அளவில் பங்கேற்றுள்ளனா். திருப்பூரில் இருந்து 50 உற்பத்தியாளா்கள் இந்தக் கண்காட்சியில் பங்கேற்றுள்ளனா்.

இதுகுறித்து திருப்பூா் ஏற்றுமதியாளா்கள் சங்கத்தின் தலைவா் கே.எம்.சுப்பிரமணியன் கூறுகையில், ‘யமடோ நிறுவன தலைவா் மற்றும் இயந்திர உற்பத்தி நிறுவனங்களின் பொது மேலாளா்களிடம் பேச்சுவாா்த்தை நடத்தப்பட்டது. இதுபோன்ற கண்காட்சியை திருப்பூரிலும் நடத்த வேண்டும் என்று அழைப்பு விடுக்கப்பட்டுள்ளது’ என்றாா்.