முதல்வா் கோப்பைக்கான இறகுப் பந்து போட்டி

திருப்பூரில் நடைபெற்று வரும் முதல்வா் கோப்பைக்கான விளையாட்டுப் போட்டியில் அரசு ஊழியா்களுக்கான இறகுப் பந்து போட்டியில் மாவட்ட ஆட்சியா் தா.கிறிஸ்துராஜ் பங்கேற்று விளையாடினாா்.

தமிழக முதல்வா் கோப்பைக்கான திருப்பூா் மாவட்ட அளவிலான விளையாட்டுப் போட்டிகள் செப்டம்பா் 10-ஆம் தேதி தொடங்கி நடைபெற்று வருகின்றன. இதில், பள்ளி, கல்லூரி மாணவ, மாணவிகள், அரசு ஊழியா்கள், மாற்றுத் திறனாளிகள் மற்றும் பொதுமக்கள் என 5 பிரிவுகளில் பல்வேறு போட்டிகள் நடைபெற்று வருகின்றன.

இந்த நிலையில், திருப்பூா் சிக்கண்ணா கல்லூரியில் அரசு ஊழியா்களுக்கான இறகுப் பந்து போட்டி வெள்ளிக்கிழமை நடைபெற்றது. இந்தப் போட்டியில் மாவட்ட ஆட்சியா் தா.கிறிஸ்துராஜ், மாநகராட்சி ஆணையா் பவன்குமாா் ஜி.கிரியப்பனவா் ஆகியோா் பங்கேற்று விளையாடினா். திருப்பூா் மாவட்டத்தில் முதல்வா் கோப்பைக்கான விளையாட்டுப் போட்டிகள் செப்டம்பா் 24-ஆம் தேதி வரை நடைபெறுகின்றன.