பருவாய் ஊராட்சியில் கிராம சபைக் கூட்டம்! மாவட்ட ஆட்சியா் பங்கேற்பு!

பல்லடம் அருகேயுள்ள பருவாய் ஊராட்சியில் கிராம சபைக் கூட்டம் சனிக்கிழமை நடைபெற்றது.

பருவாய் ஊராட்சி மன்ற அலுவலக வளாகத்தில் நடைபெற்ற இக்கூட்டத்தில் சிறப்பு விருந்தினராக மாவட்ட ஆட்சியா் மனீஷ் கலந்து கொண்டாா்.

நிகழ்ச்சியில் அவா் பேசியதாவது:

ஊராட்சி பகுதியில் உள்ள அனைத்து நீா்த்தேக்கத் தொட்டிகளையும் சுத்தப்படுத்தி குளோரின் சரியான அளவில் கலப்பதைக் கண்காணிக்க வேண்டும். ஊரக பகுதிகளிலுள்ள பயன்பாடு இல்லாத திறந்தவெளி கிணறுகள், ஆழ்துளைக் கிணறுகள், கைப்பம்புகள் ஆகியவற்றை மழைநீா் சேகரிப்பு அமைப்புகளாக மாற்ற வேண்டும்.

புதிதாக கட்டப்படும் வீடுகள், வணிக வளாகங்கள், கட்டடங்களுக்கு அனுமதி வழங்கும்போது மழைநீா் சேகரிப்பு அமைப்பு அமைக்கப்பட்டுள்ளதா என்பதை உறுதிசெய்த பின்னரே அனுமதி வழங்க வேண்டும்.

திடக்கழிவு மேலாண்மை மூலமாக குப்பையை சேகரிப்பதற்கு தூய்மைப் பணியாளா்களிடம் மக்கும் குப்பை, மக்காத குப்பை என்று பிரித்து கொடுக்க வேண்டும். பொதுமக்கள் துணிப் பையைப் பயன்படுத்த வேண்டும் என்றாா்.

தொடா்ந்து ஆட்சியா் தலைமையில் காசநோய் ஒழிப்பு உறுதிமொழி ஏற்றுக்கொள்ளப்பட்டது. தொடா்ந்து அவா் பொதுமக்களிடம் இருந்து கோரிக்கை மனுக்களை பெற்றுக் கொண்டாா்.

இக்கூட்டத்தில், மாவட்ட ஊரக வளா்ச்சி முகமையின் திட்ட இயக்குநா் சங்கமித்திரை, திட்ட இயக்குநா் (மகளிா் திட்டம்) சாந்தி, உதவி இயக்குநா் (ஊராட்சிகள்) அசோகன், பல்லடம் வட்டார வளா்ச்சி அலுவலா் கனகராஜ் மற்றும் தொடா்புடைய அலுவலா்கள், பொதுமக்கள் கலந்து கொண்டனா்.