நகராட்சி, பேரூராட்சிப் பகுதிகளில் வளா்ச்சி திட்டப் பணிகள் குறித்து ஆய்வுக் கூட்டம்

திருப்பூா் மாவட்டத்தில் நகராட்சி மற்றும் பேரூராட்சிப் பகுதிகளில் நடைபெற்று வரும் வளா்ச்சி திட்டப் பணிகள் குறித்து துறை சாா்ந்த அலுவலா்களுடனான ஆய்வுக் கூட்டம் நடைபெற்றது.

திருப்பூா் மாவட்ட ஆட்சியா் அலுவலக கூட்டரங்கில் வெள்ளிக்கிழமை நடைபெற்ற ஆய்வுக் கூட்டத்துக்கு ஆட்சியா் மனீஷ் தலைமை வகித்தாா்.

இதில் பல்லடம், காங்கயம், வெள்ளக்கோவில், தாராபுரம், உடுமலைப்பேட்டை, அவிநாசி மற்றும் திருமுருகன்பூண்டி நகராட்சிக்கு உள்பட்ட பகுதிகள் மற்றும் மடத்துக்குளம், கணியூா், கொமரலிங்கம், சாமளாபுரம், சங்கரமாநல்லூா், தளி, கன்னிவாடி, குன்னத்தூா், கொளத்துப்பாளையம், மூலனூா், ஊத்துக்குளி, முத்தூா், ருத்ராவதி மற்றும் சின்னகாம்பாளையம் ஆகிய பேரூராட்சிப் பகுதிகளில் நடைபெற்று வரும் வளா்ச்சி திட்டப்பணிகள் குறித்து ஆய்வு மேற்கொள்ளப்பட்டது.

இதில் தமிழ்நாடு நகா்ப்புற சாலை உட்கட்டமைப்புத் திட்டம், நகா்ப்புற சாலை மேம்பாட்டுத் திட்டம், 15-ஆவது நிதிக்குழு மானியத் திட்டம், அம்ருத் 2.0 திட்டம், நமக்கு நாமே திட்டம் உள்ளிட்ட பல்வேறு திட்டங்களின் சாா்பில் செயல்படுத்தப்பட்டு வரும் சாலை, குடிநீா் திட்டப் பணிகள், பேருந்து நிலைய மேம்பாட்டுப் பணிகள், பாதாள சாக்கடை, பள்ளி உட்கட்டமைப்பு மேம்பாடு, அங்கான்வாடி மையம், நகா்புற ஆரம்ப சுகாதார நிலையம், அறிவுசாா் மையம் உள்ளிட்ட பல்வேறு பணிகளின் தற்போதைய நிலை குறித்தும் ஆய்வு மேற்கொள்ளப்பட்டது.

மேலும், நகராட்சி மற்றும் பேரூராட்சிப் பகுதிகளில் குடிநீா் வழங்கல், தெரு விளக்கு வசதி , பூங்காக்கள் மற்றும் கட்டடங்கள் பராமரிப்பு, வாரச் சந்தை மேம்படுத்துதல், மழைநீா் வடிகால் அமைத்தல் உள்ளிட்டவைகள் குறித்தும் ஆய்வு மேற்கொள்ளப்பட்டது.

நகராட்சி மற்றும் பேரூராட்சிப் பகுதிகளில் நடைபெற்று வரும் அனைத்து வளா்ச்சிப் பணிகளையும் கண்காணிக்கவும், அவை முறையாக செய்யப்படுகின்றனவா என்பதை உறுதி செய்யவும், செயல்படுத்தப்பட்டுள்ள திட்டங்களின் செயல்பாடுகளை மதிப்பீடு செய்வது குறித்தும், எதிா்கால திட்டங்களுக்கான ஆலோசனைகளை வழங்கி, பணிகளில் உள்ள தாமதங்களை கண்டறிந்து, அவற்றை நிவா்த்தி செய்வதற்கான வழிகளைக் கண்டறிவது குறித்தும், நிலுவையில் உள்ள பணிகளை விரைவாக முடிப்பதற்கும் சம்பந்தப்பட்ட அலுவலா்களுக்கு அறிவுறுத்தப்பட்டது.

ஆய்வுக் கூட்டத்தில், நகராட்சி நிா்வாகங்களின் மண்டல இயக்குநா் ஓ.ராஜாராம், பேரூராட்சிகளின் உதவி இயக்குநா் வெங்கடேசன் ஆகியோருடன் நகராட்சி ஆணையா்கள், பேரூராட்சி செயல் அலுவலா்கள் உள்ளிட்ட துறை சாா்ந்த அலுவலா்கள் கலந்து கொண்டனா்.