வீட்டில் அடைக்கப்பட்ட இளம்வயது பெண்கள் மீட்பு

தருமபுரி அருகே வீட்டில் அடைத்து வைக்கப்பட்ட இளம் வயது பெண்கள் இருவர் மீட்கப்பட்டனர்.
 ஒட்டப்பட்டி சித்தேஸ்வரா நகரைச் சேர்ந்த முருகன் மனைவி பத்மா. இவர்களுக்கு 18 வயது மற்றும் 16 வயதில் இரு மகள்கள் உள்ளனர். முருகன் கடந்த 2 ஆண்டுகளுக்கு முன்பு இறந்துவிட்டார். இதனால், அவரது மனைவி மனம் நலம் பாதிப்புக்குள்ளானதாகக் கூறப்படுகிறது.
 இந்நிலையில், கடந்த ஒன்றரை ஆண்டுக்கு முன்பு பத்மா, 18 வயது மகளுக்கு சேலத்தைச் சேர்ந்த ஒருவருக்கு திருமணம் செய்து வைத்துள்ளார். கணவருடன் ஏற்பட்ட கருத்து வேறுபாடு காரணமாக அந்த பெண் தனது தாய்வீடான ஒட்டப்பட்டிக்கு வந்துவிட்டார்.
 இதையடுத்து, பத்மா தனது இரு மகள்களையும் வீட்டை விட்டு வெளியே அனுப்புவதில்லையாம்.
 மேலும், அச்சப்பட்டு தனது இருமகள்களையும் வீட்டுக்குள் வைத்து பூட்டி வைத்ததாகக் கூறப்படுகிறது.
 இது குறித்து, சைல்டு லைன் எண் 1098-க்கு தகவல் கிடைத்துள்ளது. இதன் பேரில், மாவட்ட குழந்தைகள் பாதுகாப்பு அலுவலர் மீனாட்சி, சைல்டு லைன் நிர்வாகிகள் ஆகியோர் சென்று சம்பந்தப்பட்ட வீட்டிற்கு சென்று பார்த்தனர். அங்கு வீட்டிற்குள் இளம்வயது பெண்கள் இருவர் அடைக்கப்பட்டது தெரியவந்தது.
 இதையடுத்து, இருவரும் மீட்கப்பட்டு, மாவட்ட குழந்தைகள் நல குழுமத்திடம் ஒப்படைக்கப்பட்டனர். மேலும், அவர்களின் தாய் பத்மா, சோகத்தூரில் உள்ள மெர்சி இல்லத்துக்கு அனுப்பி வைக்கப்பட்டார்.