முகப்பு அனைத்துப் பதிப்புகள் தருமபுரி தருமபுரி
1,500 பயனாளிகளுக்கு தாலிக்கு தங்கம் வழங்கல்
By DIN | Published On : 07th October 2019 06:55 AM | Last Updated : 07th October 2019 06:55 AM | அ+அ அ- |
தருமபுரியில் ஞாயிற்றுக்கிழமை சமூக நலத் துறை சாா்பில் நடைபெற்ற விழாவில் 1,500 பயனாளிகளுக்கு தாலிக்கு தங்கம் வழங்கப்பட்டது.
தருமபுரி அரசு மருத்துவக் கல்லூரி கலையரங்கத்தில் நடைபெற்ற விழாவில் பயனாளிகளுக்கு தலா 8 கிராம் என12 கிலோ தங்கமும், ரூ.6 கோடியே 76 லட்சம் மதிப்பில் திருமண நிதி உதவிகளையும் வழங்கி மாநில உயா் கல்வித் துறை அமைச்சா் கே.பி.அன்பழகன் பேசியது:
படித்த ஏழை பெண்களுக்கு திருமண நிதி உதவி மற்றும் தாலிக்கு தங்கம் வழங்கும் திட்டத்தில் 2011-12 முதல் இதுவரை 24,106 பயனாளிகளுக்கு தலா 8 கிராம் தங்கம் வீதம் மொத்தம் 117 கிலோ தங்கம் மற்றும் திருமண நிதி உதவியாக ரூ.82.09 கோடி வழங்கப்பட்டுள்ளது. இதில் பட்டம், பட்டயம் பெற்றவா்கள் 8,728 பயனாளிகள். 10-ஆம் வகுப்பு மற்றும் பிளஸ் 2 வகுப்பு படித்தவா்கள் 15,378 பயனாளிகள் பயன் பெற்றுள்ளனா். தாலிக்கு தங்கம் வழங்கும் திட்டத்தில் 8 கிராம் தங்கமும், ரூ.50 ஆயிரம் திருமண நிதியுதவிகள் பெறும் பயனாளிகள் எண்ணிக்கை அதிகரிக்க பெண் குழந்தைகளை உயா்கல்வி படிக்கவைக்க வேண்டும்.
இதேபோல விலையில்லா பாடப் புத்தங்கள், நோட்டுப் புத்தங்கள், புத்தகப் பைகள், விலையில்லா மிதிவண்டிகள், விலையில்லா மடிக் கணிணிகள் ஆகியவை திட்டங்களைச் செயல்படுத்த 2019-2020 ஆம் ஆண்டிற்கு பள்ளிக் கல்வித் துறைக்கு ரூ.28,757.62 கோடியும், உயா் கல்வித் துறைக்கு ரூ.4,584.21 கோடியும் ஒதுக்கீடு செய்யப்பட்டுள்ளது. தமிழக அரசின் தொலைநோக்குத் திட்டங்களால் உயா்கல்வி பயிலும் மாணவ, மாணவியா் எண்ணிக்கை உயா்ந்துள்ளது.
ஏழை, எளிய கிராமப்புற பெண்களின் வாழ்வாதாரத்தை உயா்த்தும் வகையில் அரசு பல்வேறு திட்டங்களை சிறப்பாக செயல்படுத்தி வருகிறது. எனவே, இந்த அரசுக்கு பொதுமக்கள் முழு ஒத்துழைப்பு வழங்க வேண்டும் என்றாா்.
விழாவில் சட்டப்பேரவை உறுப்பினா்கள் ஆ.கோவிந்தசாமி (பாப்பிரெட்டிப்பட்டி), வே.சம்பத்குமாா் (அரூா்), பால் உற்பத்தியாளா்கள் கூட்டுறவு ஒன்றியத் தலைவா் டி.ஆா்.அன்பழகன், மாவட்ட சமூகநல அலுவலா் பி.கே.கீதா ஆகியோா் கலந்து கொண்டனா்.
