காவிரி மிகை நீரை ஏரிகளில் நிரப்பும் திட்டத்தை நிறைவேற்ற வேண்டும்

தருமபுரி: காவிரி மிகை நீரை ஏரிகளில் நிரப்பும் திட்டத்தை நிறைவேற்ற நடவடிக்கை எடுக்க வேண்டும் என விவசாயிகள் குறைகேட்புக் கூட்டத்தில் வலியுறுத்தப்பட்டது.

தருமபுரி மாவட்ட விவசாயிகள் குறைகேட்புக் கூட்டம் வியாழக்கிழமை மாவட்ட வருவாய் அலுவலா் எச்.ரகமதுல்லா கான் தலைமையில் நடைபெற்றது.

இக் கூட்டத்தில், தமிழக விவாயிகள் சங்க மாநிலத் தலைவா் எஸ்.ஏ.சின்னசாமி பேசியது: தத்கல் முறையில் விவசாயிகளுக்கு மின் இணைப்பு வழங்கும் திட்டத்தில், நீண்ட காலமாக மின் இணைப்புக்காக பதிவு செய்த விவசாயிகளுக்கு முன்னுரிமை வழங்க வேண்டும். எண்ணேகொல்புதூா்-தும்பலஅள்ளி இணைப்புக் கால்வாய்த் திட்டம், அலியாளம்-தூள்செட்டி ஏரி மற்றும் ஜொ்த்தலாவ்-புலிகரை ஏரி இணைப்பு திட்டங்கள் ஏற்கெனவே அறிவிக்கப்பட்டது. இதற்கான அரசாணையும் வெளியிடப்பட்டது. இந்த திட்டங்களின் செயல்பாடு தற்போது எந்த நிலையில் உள்ளது என்பதை விவசாயிகளுக்கு தெரியப்படுத்தி, அவற்றை துரிதமாக நிறைவேற்ற வேண்டும். அதேபோல, மழைக்காலங்களில் ஒகேனக்கல் காவிரியில் மிகையாக செல்லும் நீரை தருமபுரி மாவட்டத்தில் உள்ள ஏரிகளில் நிரப்பும் திட்டம் நடைமுறைப்படுத்த வேண்டும் என கடந்த இரண்டு ஆண்டுகளாக கோரிக்கை விடுத்து வருகிறோம். ஆனால், இத் திட்டத்தை நிறைவேற்றாததால், இரண்டு ஆண்டுகளாக காவிரியில் மிகை நீா் வீணாக சென்று கடலில் கலந்துள்ளது. இத் திட்டத்தின் மூலம், ஒரு முறை ஏரிகளை நீரை நிரப்பினால், இரண்டு ஆண்டுகளுக்கு பாசன வசதிபெற முடியும். ஆகவே எதிா்வரும் ஆண்டாவது தயவு கூா்ந்து, மிகை நீா் கடலில் கலப்பதை தவிா்க்க, தருமபுரி மாவட்ட ஏரிகளில் நீா் நிரப்பும் திட்டத்தை நிறைவேற்ற நடவடிக்கை எடுக்க வேண்டும் என்றாா்.

சிறுதானிய உற்பத்தியாளா் சங்கத் தலைவா் சிவலிங்கம் பேசியது: பென்னாகரம் பகுதியில் சுமாா் 20,000 பாரம்பரிய ஆலம்பாடி மாடுகள் உள்ளன. இந்த மாடுகளுக்கு கோடை காலத்தில் தண்ணீா் மற்றும் தீவனம் கிடைப்பதில்லை. ஆகவே, இவற்றை அடிமாடுகளாக விற்கும் நிலை அப்பகுதி கால்நடை விவசாயிகளுக்கு ஏற்படுகிறது. எனவே, கோடை காலங்களில் பென்னாகரம் வனப்பகுதியில், மாடுகளுக்கு தண்ணீா் வழங்க வனத்துறை நடவடிக்கை எடுக்க வேண்டும். அதேபோல, இலவசமாக தீவனம் வழங்க மாவட்ட நிா்வாகம் நடவடிக்கை எடுக்க வேண்டும் என்றாா்.

தமிழ் மாநில விவசாயத் தொழிலாளா் சங்க மாவட்டச் செயலா் ஜெ.பிரதாபன் பேசியது: வறட்சி மாவட்டமாக தருமபுரி மாவட்டத்தை அறிவித்தும், இதுவரை தென்னை மரங்களுக்கு இழப்பீடு வழங்கவில்லை. அதேபோல, தத்கல் மின் இணைப்பு வழங்கும் திட்டத்தை தருமபுரி மாவட்டத்தை கைவிட்டு, கடந்த 19 ஆண்டுகளாக மின் இணைப்புக்கு காத்திருக்கும் விவசாயிகளுக்கு விரைந்து மின் இணைப்பு வழங்க வேண்டும். பிற்பட்டோா் நலத்துறை சாா்பில் விவசாயிகளுக்கு ஆழ்துளைக் கிணறு கடன் வழங்க தோ்வு செய்யப்பட்ட பயனாளிகளுக்கு நீண்ட நாள்களாக கடன்தொகை வழங்கப்படவில்லை. எனவே, அப்பயனாளிகளுக்கு மானியத்துடன் கூடிய கடன்தொகை விரைந்து வழங்க வேண்டும். மாவட்டத்தில் உள்ள மேய்த்தல் புறம்போக்கு நிலங்களை அரசு கட்டடங்கள் கட்ட பயன்படுத்தக் கூடாது என்றாா்.

அதேபோல, சந்தன மரங்கள் மற்றும் சிவப்பு சந்தனம் மரம் வளா்க்க அனுமதி வழங்க வேண்டும். கேசரிகுலே அணை வலது, இடது புறக்கால்வாய்களில் உள்ள ஆக்கிரமிப்புகள் அகற்ற வேண்டும். ஏ.கொல்லஅள்ளியிலிருந்து செட்டிக்கரை செல்லும் மழைநீா்க் கால்வாயை தூா்வார வேண்டும். தேசிய வங்கிகளில் விவசாயிகளுக்கு குறைந்த வட்டியில் வழங்கப்பட்ட நகைக்கடன்களை தொடா்ந்து வழங்க வேண்டும். சின்னாற்றின் குறுக்கே தடுப்பணை கட்ட வேண்டும் என விவசாயிகள் வலியுறுத்தி பேசினா்.

இக் கூட்டத்தில், அரூா் சாா்-ஆட்சியா் பிரதாப், வேளாண் அறிவியல் நிலைய திட்ட ஒருங்கிணைப்பாளா் பா.ச.சண்முகம் மற்றும் வேளாண், தோட்டக்கலைத்துறை அலுவலா்கள் கலந்து கொண்டனா்.