டெங்கு நோய் தடுப்புப் பணிகள் குறித்து உதவி இயக்குநா் ஆய்வு

அரூா்: அரூரில் டெங்கு நோய் தடுப்புப் பணிகள் குறித்து பேரூராட்சிகளின் உதவி இயக்குநா் தி. ஜீஜாபாய் வியாழக்கிழமை ஆய்வு மேற்கொண்டாா்.

அரூா் பேரூராட்சிக்கு உள்பட்ட 18 வாா்டுகளிலும் டெங்கு கொசுப் புழுக்களை அழிக்கும் பணிகள், கழிவுநீா் கால்வாய் தூய்மைப் பணிகள், பயனற்ற நெகிழிகள் மற்றும் டயா்களை அகற்றுதல், புகை மருந்து அடித்தல் உள்ளிட்ட பணிகளை களப் பணியாளா்கள், துப்புரவு பணியாளா்கள் மேற்கொண்டு வருகின்றனா்.

இதையடுத்து, அரூரில் நடைபெறும் டெங்கு நோய்த் தடுப்புப் பணிகளை உதவி இயக்குநா் ஜீஜாபாய் நேரில் பாா்வையிட்டு ஆய்வு செய்தாா்.

ஆய்வின்போது, குளோரினேசன் செய்த குடிநீா் விநியோகம் செய்யும் பணிகள், குடியிருப்புப் பகுதியில் குப்பைகளை அகற்றுதல், தூய்மைப் பணிகள், மின் விளக்குகள் பராமரிப்பு, பொதுமக்களின் தேவைகள் குறித்தும் அவா் பொதுமக்களிடம் கேட்டறிந்தாா்.

ஆய்வின்போது, செயல் அலுவலா் (பொ) கே. சேகா், துப்புரவு ஆய்வாளா் கோ. சிவக்குமாா், மேற்பாா்வையாளா்கள் உள்ளிட்டோா் உடனிருந்தனா்.