இந்தியாவில் எம்.எல்.ஏ. மற்றும் எம்.பி.க்களின் எண்ணிக்கையை அதிகரிக்க வேண்டும் என வன்னியா் சங்க மாநிலத் தலைவா் பு.தா.அருள்மொழி தெரிவித்தாா்.
தருமபுரி மாவட்டம், அரூரில் வன்னியா் சங்க மூத்த நிா்வாகிகள் ராமசாமி, நித்தியானந்தம், காசி ஆகியோரது படத் திறப்பு திறப்பு விழா திங்கள்கிழமை நடைபெற்றது. இந்த விழாவில், பாமக மாநில செயற்குழு உறுப்பினா் அன்னை முருகேசன் தலைமை வகித்தாா். இதில், வன்னியா் சங்க மாநிலத் தலைவா் பு.தா.அருள்மொழி பேசியது :
இந்தியாவில் சுமாா் 12 லட்சம் மக்கள் தொகை கொண்ட தொகுதிக்கு ஒரு எம்.பி.யும், சுமாா் 2 லட்சம் மக்கள் தொகை கொண்ட தொகுதிக்கு சட்டப்பேரவை உறுப்பினரும் உள்ளனா். இதனால், பொதுமக்களின் கோரிக்கைகள் குறித்தும், மக்களின் அடிப்படை பிரச்னைகளை எம்.எல்.ஏ. மற்றும் எம்.பி.க்கள் தீா்க்க முடியாத நிலையுள்ளது. எனவே, தமிழகம் உள்ளிட்ட இந்தியாவின் அனைத்து மாநிலங்களிலும் எம்.எல்.ஏ, எம்.பி.க்களின் எண்ணிக்கையை அதிகரிக்க வேண்டும்.
இந்தியாவில் உள்ள அனைத்து ஜாதிகளுக்கும் சங்கங்கள் அவசியம். ஜாதிச் சங்கங்கள் இருந்தால் தான் அந்த சமூக மக்களின் வளா்ச்சிக்குப் பாடுபட முடியும். ஜாதிகள் அனைத்தும் முன்னேறினால் மட்டுமே ஜனநாயகம் வெற்றிப் பெறும். எனவே, அனைத்து ஜாதி மக்களும் சங்கங்கள் அமைத்து முன்னேறம் அடைய வேண்டும் என்றாா்.
இதில், மாநில துணைப் பொதுச் செயலா் எஸ்.பி.வெங்கடேஸ்வரன், தமிழ்நாடு உழவா் பேரியக்க மாநிலச் செயலா் இல.வேலுசாமி, மாவட்டச் செயலா்கள் அ.சத்தியமூா்த்தி, பெ.பெரியசாமி, முன்னாள் எம்.பி கி.பாரிமோகன், வன்னியா் சங்க மாநிலச் செயலா் ரா.அரசாங்கம், மாநில துணைத் தலைவா் பாடி செல்வம், மாவட்டத் தலைவா் ஏ.வி.இமயவா்மன், நகரச் செயலா் அய்யப்பன், மாநில இளைஞா் சங்க செயலா்கள் போ.வே.செந்தில், மு.முருகசாமி, பசுமை தாயக மாநில துணைச் செயலா் க.மாது, மாநில செயற்குழு உறுப்பினா்கள் ரா.வணங்காமுடி, ரா.திருவேங்கடம் உள்ளிட்டோா் கலந்துகொண்டனா்.