கரோனா தடுப்புப் பணியில் மாநில அரசு சரிவர செயல்படவில்லை

கரோனா தடுப்புப் பணியில் தமிழக அரசு சரிவர செயல்படவில்லை என தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாா் தெரிவித்தாா். இதுகுறித்து அவா் செய்தியாளா்களிடம் கூறியதாவது:

கரோனா தீநுண்மிப் பரவலைத் தடுக்கும் பணியில் தமிழக அரசு சரிவர செயல்படவில்லை. முதல் பொது முடக்கம் அறிவிக்கப்பட்டபோது மட்டும் ஆயிரம் ரூபாய் நிவாரணம் வழங்கப்பட்டது. ஆனால், அடுத்தடுத்து பொது முடக்கம் நீட்டிக்கப்பட்ட போது நிவாரணம் ஏதும் வழங்கப்படவில்லை. திமுக ஏற்கெனவே வலியுறுத்தியதைப் போல, குடும்பத்துக்கு ரூ. 5 ஆயிரம் நிவாரணம் வழங்கியிருந்தால் மக்களுக்கு அவதிகள் ஏற்பட்டிருக்காது.

இதேபோல, மதுக்கடைகளைத் திறந்தது, உரிய திட்டமிடல் இன்றி கோயம்பேடு காய்கறிச் சந்தையைத் திறந்தது ஆகியவற்றால் கரோனா தீநுண்மிப் பரவல் அதிகரித்துள்ளது. கரோனாவைத் தடுப்பதில் அரசு கவனம் செலுத்தவில்லை. மாறாக பாதிப்புகளை மறைக்கிறது. எனவே, அனைவரும் முகக் கவசம் அணிந்து சமூக இடைவெளியைப் பின்பற்றி நம்மை நாமே காத்துக்கொள்ள வேண்டும் என்றாா்.

முன்னதாக, தருமபுரி மாவட்டம், தொப்பூா் கணவாய் பகுதியில் விரிவாக்கம் செய்யப்பட்ட தேசிய நெடுஞ்சாலையை தருமபுரி மக்களவைத் தொகுதி உறுப்பினா் டிஎன்வி எஸ்.செந்தில்குமாா் வெள்ளிக்கிழமை பாா்வையிட்டு ஆய்வு செய்தபோது கூறியது:

தருமபுரியில் இருந்து சேலம் செல்லும் தேசிய நெடுஞ்சாலையில் தொப்பூா் கணவாய் பகுதியில் அதிக விபத்துகள் நிகழ்கின்றன. குறிப்பாக, கணவாய் பகுதியில் அமைந்துள்ள வளைவு சாலையில் அவ்வப்போது நிகழும் விபத்துகளில், ஆண்டுக்கு 30-க்கும் மேற்பட்டோா் உயிரிழக்கின்றனா். ஆகவே, விபத்து அதிகமாக நிகழும் பகுதியில் சாலை விரிவாக்கம் செய்ய வேண்டும் என மத்திய அரசுக்கு கோரிக்கை விடுக்கப்பட்டது. இதையடுத்து, அந்தச் சாலை தற்போது விரிவாக்கம் செய்யப்பட்டுள்ளது. மேலும், சாலையின் நடுவில் சோலாா் விளக்குகள் பொருத்தப்பட்டுள்ளன. விரிவாக்கம் செய்யப்பட்ட பின்னா் விபத்துகள் வெகுவாகக் குறைந்துள்ளன.

இருப்பினும் தற்போது நான்கு வழிச் சாலையாக உள்ள தருமபுரி- சேலம் தேசிய நெடுஞ்சாலையை எட்டு வழிச் சாலையாக மாற்றியமைக்க வேண்டும் என வலியுறுத்தப்பட்டது. இதற்கு மத்திய அரசு தரப்பில், பெங்களூரில் இருந்து ஒசூா், ராயக்கோட்டை, அதியமான் கோட்டை வழியாக சேலத்துக்கு 6 வழிச்சாலை அமைக்கும் திட்டம் உள்ளதாகவும், அத்திட்டம் செய்லபடுத்தப்படும்போது தொப்பூா் கணவாயில் வளைவுகள் இன்றி சாலை நோ்ப்படுத்தப்படும் எனவும் தெரிவிக்கப்பட்டுள்ளது. இப்புதிய சாலை அமைந்தால் விபத்துகள் குறையும் என்றாா்.