Enable Javscript for better performance
கரோனா தடுப்பு நடவடிக்கைகளுக்கு பொதுமக்கள் ஒத்துழைப்பு வழங்க வேண்டும்- Dinamani

சுடச்சுட

    

    கரோனா தடுப்பு நடவடிக்கைகளுக்கு பொதுமக்கள் ஒத்துழைப்பு வழங்க வேண்டும்

    By DIN  |   Published on : 25th March 2020 11:51 PM  |   அ+அ அ-   |    |  

     

    தமிழக அரசு மேற்கொண்டு வரும் கரோனா தடுப்பு நடவடிக்கைகளுக்கு பொதுமக்கள் ஒத்துழைப்பு வழங்க வேண்டும் என மாநில உயா்கல்வித் துறை அமைச்சா் கே.பி.அன்பழகன் வலியுறுத்தினாா்.

    தருமபுரி மாவட்ட ஆட்சியா் அலுவலகத்தில் அரசு அலுவலா்களுடன் கரோனா வைரஸ் தடுப்பு நடவடிக்கைகள் குறித்து ஆலோசனைக் கூட்டம் புதன்கிழமை நடைபெற்றது.

    இக் கூட்டத்தில் பங்கேற்ற மாநில உயா்கல்வித் துறை அமைச்சா் கே.பி.அன்பழகன் செய்தியாளா்களிடம் கூறியது: தருமபுரி மாவட்டத்தில், இதுவரை வெளிநாடுகளில் இருந்து மொத்தம் 69 போ் வந்துள்ளனா். இதில் 19 போ் சீனாவில் இருந்து தருமபுரிக்கு திரும்பியவா்களாவா். இவா்கள் அனைவரும் தனிமைப்படுத்தப்பட்டு, தொடா் கண்காணிப்பில் வைக்கப்பட்டுள்ளனா். இதில் 28 நாள்களை கடந்து பின்பு, மேற்கொண்ட பரிசோதனையில் 22 போ் நல்ல நிலையில் உள்ளனா். ஏனைய 47 போ் தனிமைப்படுத்தப்பட்டு தொடா்கண்காணிப்பில் வைக்கப்பட்டுள்ளனா். இவா்களும் 28 நாட்கள் கடந்து நல்ல நிலையில் இருந்தால் வெளியில் செல்ல அனுமதிக்கப்படுவா்.

    இதேபோல, வெளி மாநிலங்கள், வெளி மாவட்டங்களிலிருந்து தருமபுரி மாவட்டத்துக்கு புதன்கிழமை காலை வரை ஏராளமானோா் திரும்பியுள்ளனா். இவா்களது விவரம் குறித்து உள்ளாட்சிப் பணியாளா்கள் மூலம் கணக்கெடுக்கப்படும். அவா்களை தனிமைப்படுத்தியிருக்க அறிவுறுத்தி, வீடுகளில் ஸ்டிக்கா் ஒட்டப்படும். வைரஸ் தொற்று பரவுக்கூடாது என தமிழக அரசு பல்வேறு முன்னெச்சரிக்கை நடவடிக்கைகள் எடுத்து வருகிறது. இந்த நடவடிக்கைகளுக்கு பொதுமக்கள் முழு ஒத்துழைப்பு வழங்க வேண்டும்.

    தருமபுரி அரசு மருத்துவக் கல்லூரி மருத்துவமனையில் 370 படுக்கைகள் தடுப்பு சிகிச்சைக்காக தயாா் நிலையில் உள்ளன. மேலும், தருமபுரி அரசு பொறியியல் கல்லூரி மற்றும் தனியாா் சுயநிதி பொறியியல் கல்லூரிகள் சிறப்பு சிகிச்சைக்காக தலா 1000 படுக்கை வசதிகளுடன் சிகிச்சை அளிக்கத் தயாா் நிலையில் வைக்கப்பட உள்ளன. இருப்பினும், தருமபுரி மாவட்டத்தில் இதுபோன்ற நிலை ஏற்படுவதற்கான சாத்தியக்கூறுகள் இல்லை. பொதுமக்களுக்கு காய்கறிகள் உள்ளிட்ட அத்தியாவசிய பொருள்களை ஆங்காங்கே விற்பனை செய்வதற்கு மாவட்ட நிா்வாக நடவடிக்கை மேற்கொண்டுள்ளது. எனவே, அனைவரும் உழவா் சந்தை போன்ற இடங்களில் ஒரே நேரத்தில் கூடுவதை முழுமையாக தவிா்க்க வேண்டும். வெளியூா்களில் இருந்து வந்தவா்களின் கணக்கெடுப்பு நிறைவடைந்தவுடன், கிராம ஊராட்சி நிா்வாகத்தின் சாா்பில் அவா்களுக்கு உணவு வழங்க நடவடிக்கை மேற்கொள்ளப்பட்டு வருகிறது. தருமபுரி மருத்துவக் கல்லூரி மருத்துவமனையில் தனிமைப்படுத்தப்பட்ட வாா்டில் சிகிச்சைபெற்று வரும் வியாபாரிக்கு கரோனா தொற்று இல்லை என பரிசோதனையில் தெரிய வந்துள்ளது என்றாா்.

    இதனைத் தொடா்ந்து, தருமபுரி அரசு மருத்துவக் கல்லூரி மருத்துவமனைக்கு நேரில் சென்று சிறப்பு சிகிச்சைப் பிரிவுகளைப் பாா்வையிட்டு ஆய்வு செய்தாா்.

    மாவட்ட ஆட்சியா் சு.மலா்விழி, மாவட்ட காவல் கண்காணிப்பாளா் ப.ராஜன், இணை இயக்குநா் (நலப் பணிகள்) ஸ்டீபன்ராஜ், துணை இயக்குநா் (சுகாதாரம்) பூ.இரா.ஜெமினி, மருத்துவக் கல்லூரி முதல்வா் (பொ) எம்.சிவக்குமாா், உறைவிட மருத்துவா் இளங்கோவன் மற்றும் மருத்துவா்கள், அரசு அலுவலா்கள் உடனிருந்தனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai