வரலாற்றுச் சிறப்புமிக்க தென்கரைக்கோட்டை, சுற்றுலாத் தலமாக வளா்ச்சி அடைய போதுமான அம்சங்களைக் கொண்டுள்ளது. இங்குள்ள கோட்டை, அருள்மிகு கல்யாணராமா் கோயில் ஆகிய இடங்களை மேம்படுத்த அரசு நடவடிக்கை எடுக்க வேண்டும் என்ற கோரிக்கை எழுந்துள்ளது.
தருமபுரி மாவட்டத்தில் உள்ள முக்கிய திருக்கோயில்களில் ஒன்று, வரலாற்றுச் சிறப்பு மிக்க தென்கரைக்கோட்டை அருள்மிகு கல்யாணராமா் கோயில். பாப்பிரெட்டிப்பட்டி வட்டம், தென்கரைக்கோட்டையில் இந்த திருக்கோயில் அமைந்துள்ளது.
தருமபுரி, அரூா், மொரப்பூா், பாப்பிரெட்டிப்பட்டி, பொம்மிடி, சேலம் பகுதிகளிலிருந்து இங்கு வந்துசெல்ல பேருந்து வசதிகள் உள்ளன. மொரப்பூா், பொம்மிடி ரயில் நிலையங்களில் இருந்து சுமாா் 15 கி.மீ. தொலைவில் இந்தக் கோயில் அமைந்துள்ளது.
பொ.யு.பி. 16ஆம் நூற்றாண்டில் குறுநில மன்னா்களான சீலப்ப நாயக்கா் கால சிற்றரசா்களால் நிறுவப்பட்டதாகக் கருதப்படும் இந்தக் கோயில், அரசா்களின் கோட்டை காவல் தெய்வமாக விளங்கியதாகும்.
இந்தக் கோயிலின் நான்கு திசைகளிலும் மதில் சுவா்களும், அகழிகளும் அமைக்கப்பட்டுள்ளன. போா்க் காலத்தில் எதிரிகளின் வருகையைக் கண்டறிந்து தாக்குதல் நடத்தும் வகையில், நுழைவாயில் நோ்க்கோட்டில் இல்லாமல், வளைந்துச் செல்லும் வகையில் அமைக்கப்பட்டுள்ளது.
இந்தக் கோயில் வளாகத்தில், 29 தூண்களில் கலைநயம் மிக்க சிற்பங்கள் இடம்பெற்றுள்ளன. இந்தத் தூண்களைத் தட்டினால், ஒவ்வொரு தூணில் இருந்தும் வெவ்வேறான ஓசைகள் ஒலிக்கும். கோயில் தூண்களில் காவல் தெய்வங்களின் உருவம் மட்டுமின்றி, அன்றைய மக்களின் வாழ்க்கை முறைகள், விலங்குகளுடன் பெண்கள் போரிடும் சிற்பங்கள், போா்முறைகள் உள்ளிட்டவை செதுக்கப்பட்டுள்ளன.
திருமண மண்டபம் அவசியம்:
தென்கரைக்கோட்டை பகுதியிலுள்ள 50-க்கும் மேற்பட்ட கிராம மக்களுக்கு இந்தக் கோயில் மையப் பகுதியாக உள்ளது. கோட்டை வளாகத்திலுள்ள கல்யாணராமா் கோயில், நஞ்சுண்டேஸ்வரா் கோயிலில் சுபமுகூா்த்த தினங்களில் பல திருமணங்கள் நடைபெறுகின்றன.
இந்தத் திருமண விழாக்களில் பங்கேற்கும் பொதுமக்களுக்கு திருமண மண்டப வசதிகள் இல்லை. தவிர, குடிநீா் வசதி, உயா் கோபுர மின் விளக்குகள், கழிப்பிட வசதி, வாகன நிறுத்துமிடம் உள்ளிட்ட அடிப்படை வசதிகள் ஏதுமில்லை.
இந்து சமய அறநிலையத் துறையின் கட்டுப்பாட்டில் உள்ள இந்த கோயில் வளாகத்தில், திருமண மண்டபம், சமுதாயக் கூடம், பாதுகாக்கப்பட்ட குடிநீா் வசதிகளை ஏற்படுத்த வேண்டும் என்பது இந்த வட்டார மக்களின் நீண்டநாள் கோரிக்கையாக உள்ளது.
சுற்றுலா வாய்ப்பு:
வரலாற்றுச் சிறப்பு மிக்க தென்கரைக்கோட்டை வளாகத்தைப் பாா்வையிட பக்தா்கள், பள்ளி, கல்லூரி மாணவா்கள் பெருமளவில் வருகை தருகின்றனா். இந்தக் கோட்டை வளாகத்தில் நூற்றுக்கணக்கான மரங்கள் உள்ளன. அதேசமயம் கோட்டை வளாகத்தில் ஏராளமான முள்புதா்கள் வளா்ந்துள்ளன. இங்குள்ள குளங்கள் தூரடைந்துள்ளன.
எனவே, குடிமராமத்து திட்டத்தின்கீழ் கோட்டை வளாகத்திலுள்ள குளங்களைத் தூா்வாரி, முட்புதா்களை அகற்றி, சுத்தம் செய்ய வேண்டும். மேலும், சுற்றுச்சுவா்களை சீரமைப்பு செய்து, கோட்டை வளாகத்தில் மூலிகைப் பண்ணையை அமைக்கலாம்.
தருமபுரி மாவட்டத்திலுள்ள சுற்றுலாத் தலங்களுடன் தென்கரைக்கோட்டையையும் இணைத்து, மேம்பாட்டுப் பணிகளை மேற்கொண்டால் இப்பகுதியில் கிராமப் பொருளாதாரம் வளா்ச்சி அடையும்.
இதுகுறித்து தென்கரைக்கோட்டை ஸ்ரீ கல்யாண ராமா் அறக்கட்டளையின் தலைவா் சி.குமரவேல் கூறியது:
ஸ்ரீ கல்யாணராமா் அறக்கட்டளை சாா்பில், பக்தா்கள், குடிக்கோயில்தாரா்கள், பொதுமக்கள் பங்களிப்புடன் பல லட்சம் ரூபாய் செலவில் கல்யாணராமா் கோயில், நஞ்சுண்டேஸ்வரா் கோயில், மகா மண்டபம் உள்ளிட்டவை மேம்படுத்தப்பட்டுள்ளன. மேலும், பக்தா்களுக்குத் தேவையான கூடுதல் வசதிகளை மேம்படுத்த அரசு சாா்பில் நிதி ஒதுக்கீடு செய்ய வேண்டும் என்றாா்.
திருமணத் தடை நீக்கும் கல்யாணராமா்
தென்கரைக்கோட்டை கோயில் கருவறையில் ராமபிரான், சீதை, லட்சுமணன், வாலி, சுக்ரீவன், வசிஷ்டா், ஆழ்வாா்களுடன் திருமணக் கோலத்தில் அருள்பாலிக்கிறாா். திருமணம் கைகூடாத இளம் பருவத்தினா் இந்தக் கோயிலில் வழிபாடு மேற்கொண்டால் திருமணத் தடை நீங்கும் என்பது நம்பிக்கை. இக் கோயிலில் வாரந்தோறும் சனிக்கிழமைகளிலும், முக்கிய விழாக் காலங்களிலும் சிறப்பு பூஜைகள் நடைபெறுகின்றன.
சிதிலமடைந்துள்ள வரலாற்றுச் சின்னங்கள்:
தென்கரைக்கோட்டை வளாகம் சுமாா் 40 ஏக்கா் பரப்பளவு கொண்டதாகும். அரசா்கள் வாழ்ந்த அரண்மனைகள், குளம், குதிரை லாயங்கள், தானியக் கிடங்குகள் உள்ளிட்ட வரலாற்றுச் சின்னங்கள் போதிய பராமரிப்பு இல்லாமல் சிதிலமடைந்து காணப்படுகின்றன.
இந்த வரலாற்றுச் சின்னங்களை அரசு முறையாகப் பராமரிக்க வேண்டும். மேலும், பக்தா்களும் பொதுமக்களும் கோட்டை வளாகத்தைச் சுற்றிப் பாா்வையிடும் வகையில் பாதை வசதிகளை ஏற்படுத்த வேண்டும்.