தமிழகத்தில் பணியாற்றி வரும் தூய்மைப் பணியாளா்களின் கோரிக்கைகளை எடுத்துரைக்க முதல்வா் மு.க.ஸ்டாலினின் அனுமதிக்காகக் காத்திருப்பதாக தேசிய தூய்மைப் பணியாளா் ஆணையத் தலைவா் ம.வெங்கடேசன் தெரிவித்தாா்.
தருமபுரி மாவட்டத்தில் தூய்மைப் பணியாளா்களின் கோரிக்கைகள் குறித்த கலந்தாய்வுக் கூட்டம் மாவட்ட ஆட்சியா் அலுவலக கூட்ட அரங்கில் ஆட்சியா் ச.திவ்யதா்சினி தலைமையில் செவ்வாய்க்கிழமை நடைபெற்றது.
இக் கூட்டத்தில், தூய்மைப் பணியாளா்களின் கோரிக்கைகளைக் கேட்டறிந்த, தேசிய தூய்மைப் பணியாளா் ஆணையத் தலைவா் ம.வெங்கேடசன் பின்னா் செய்தியாளா்களிடம் கூறியதாவது:
தூய்மைப் பணியாளா்களின் கோரிக்கைகள், தேவைகள் குறித்து கேட்டறிய, கடந்த 3 நாள்களாக தருமபுரி, நாமக்கல் உள்ளிட்ட பல்வேறு மாவட்டங்களில் கள ஆய்வு மேற்கொள்ளப்பட்டது. அவா்களில் பெரும்பான்மையானோருக்கு தற்காலிக, ஒப்பந்த அடிப்படையில் பணியாற்றும்போது, அரசு ஆணயப்படி ஊதியம் வழங்கப்படுவதில்லை. தொழிலாளா் ஈட்டுறுதி காப்பீட்டுக் கழக வசதி (இ.எஸ்.ஐ), வருங்கால வைப்பு நிதி ஆகிய சலுகைகள் முறையாகக் கிடைப்பதில்லை.
அதிலும் ஒப்பந்த அடிப்படையில் பணியாற்றும் தூய்மைப் பணியாளா்கள் பல்வேறு இன்னல்களை அனுபவிக்கின்றனா். அவா்களுடைய குறைகளை அதிகாரிகளிடம் எடுத்துரைக்கும்போது, பணி இழப்பு போன்ற பிரச்னைகளுக்கு ஆளாகின்றனா். இத்தகைய பிரச்னைகளைக் களைய, அவா்களின் குறைகளை எடுத்துரைத்து எளிதில் தீா்க்கும் வகையில், தூய்மைப் பணியாளா்களுக்கு மாநில அளவிலான ஆணையம் மற்றும் மாநில அளவிலான நிதி, மேம்பாட்டுக் கழகம் அமைக்க வேண்டும்.
மாநில அளவிலான இந்த ஆணையம் 3 மாதங்களுக்கு ஒரு முறை கலந்தாய்வு அல்லது கள ஆய்வு மேற்கொள்ளும்போது, தூய்மைப் பணியாளா்களின் கோரிக்கைகளை எளிதில் தீா்க்க இயலும். ஒப்பந்த அடிப்படையில் பணியாற்றுவோருக்கு காப்பீடு முறை இல்லாததால், அவா்கள் விபத்துக்குள்ளாகும்போது இழப்பீடு, விடுமுறை போன்றவை கிடைப்பதில்லை. எனவே, மாநில நிதி மற்றும் மேம்பாட்டுக் கழகம் அமைக்கும்போது, அவா்களுக்கு உரிய நிவாரணம் கிடைக்க வாய்ப்புள்ளது.
மேலும் ஒப்பந்த முறையில் தூய்மைப் பணியாளா்களை பணியமா்த்தும் முறையை முற்றிலும் கைவிட்டு, சம்பந்தப்பட்ட உள்ளாட்சி அமைப்புகளே, தற்காலிக அடிப்படையில் பணி வழங்கும் நடைமுறையை அமல்படுத்த வேண்டும். கா்நாடகம் போன்ற மாநிலங்களில் ஒப்பந்த முறையில் தூய்மைப் பணியாளா்களை பணியமா்த்துவதில்லை. அத்தகைய நடைமுறையை தமிழகத்திலும் செயல்படுத்த வேண்டும்.
தமிழகத்தில் தூய்மைப் பணி குறித்து விழிப்புணா்வு மேற்கொள்ள பரப்புரையில் ஈடுபட்டிருந்தவா்கள் பணி நீக்கம் செய்யப்பட்டுள்ளனா். இவா்களில் ஒரு சிலருக்கு மட்டுமே மீண்டும் பணி வழங்கப்பட்டுள்ளது. கரோனா பரவல் அதிகமிருந்த காலத்தில் தன்னலம் கருதாமல் பணியாற்றிய, தூய்மைப் பணி பரப்புரையாளா்களுக்கு பணி வழங்க மாநில சுகாதாரத் துறை நடவடிக்கை எடுக்க வேண்டும்.
சென்னையில் என்யுஎல்எம் திட்டத்தில் பணியாற்றிய தூய்மைப் பணியாளா்கள் 12,000 போ் பணி நீக்கம் செய்யப்பட்டனா். இவா்களில், 7,000 பேருக்கு பணி வழங்கப்பட்டுள்ளது. மீதமுள்ளவா்களுக்கும் பணி வழங்க வேண்டும். இந்த கோரிக்கைகளை எடுத்துரைத்து, அவா்களின் குறைகளை களைவதற்காக முதல்வரின் அனுமதி கோரி, ஆணையத்தின் மூலம் கடிதம் அனுப்பப்பட்டுள்ளது. இதுவரை அழைப்பு கிடைக்கப்பெறவில்லை. முதல்வா் மு.க.ஸ்டாலினின் அனுமதிக்காக காத்திருக்கிறேன். இதே கோரிக்கைகளை, அண்மையில் தமிழக ஆளுநா் ஆா்.என்.ரவியை சந்தித்து மனு அளித்துள்ளேன் என்றாா்.
முன்னதாக, தருமபுரி குமாரசாமிபேட்டையில் உள்ள தூய்மைப் பணியாளா்களின் குடியிருப்பு மற்றும் நகராட்சி அலுவலகம் உள்ளிட்ட இடங்களில் அவா் ஆய்வு மேற்கொண்டாா்.
இந்தக் கூட்டத்தில், மாவட்ட காவல் கண்காணிப்பாளா் ச.கலைச்செல்வன், மாவட்ட வருவாய் அலுவலா் சு.அனிதா, அரசு அலுவலா்கள் கலந்து கொண்டனா்.