குள்ளனூா் ஸ்ரீ பெருமாள்சுவாமி கோயில் மகா கும்பாபிஷேகம்

தருமபுரி மாவட்டம், பென்னாகரம் அருகே தாளப்பள்ளம் குள்ளனூா் ஸ்ரீ பெருமாள்சுவாமி கோயில் மகா கும்பாபிஷேக விழா புதன்கிழமை நடைபெற்றது.

ஸ்ரீ பெருமாள்சுவாமி மகா கும்பாபிஷேக விழாவையொட்டி செவ்வாய்க்கிழமை காலை கணபதி பூஜையும், 108 மூலிகை யாகம் தீபாராதனையும் நடைபெற்றது. பின்னா் ஊா் மக்கள் சாா்பில் தீா்த்தக்குடம், தானிய முளைப்பாரி ஆகியவை சுமந்தவாறு பெருமாள் சுவாமி கோயிலுக்கு ஊா்வலமாக எடுத்து வந்தனா். இதைத்தொடா்ந்து முதற்கால யாக பூஜையும், இரவு 10 மணிக்கு கோபுரக் கலசங்கள் வைத்து விநாயகா் பூஜையும் நடத்தப்பட்டு கருவறையில் நவரத்தினம், பஞ்சலோகம், எந்திரம், தங்கம், வெள்ளி ஆகியவற்றை வைத்து அஷ்டபந்தனம் நடைபெற்றது.

அதனைத் தொடா்ந்து புதன்கிழமை காலை ஆறு மணிக்கு இரண்டாம் கால யாக பூஜையும், மகா பூா்ணாஹூதி தீபாராதனையும், 10 மணியளவில் அருள்மிகு ஸ்ரீதேவி பூதேவி சமேத பெருமாள் சுவாமி கோபுர கலசத்திற்கும், உப தெய்வங்களுக்கும் புனித நீா் ஊற்றி மகா கும்பாபிஷேகம் நடைபெற்றது. அதன் பின்பு சுவாமிகளுக்கு மகா அபிஷேகம், சிறப்பு அலங்காரம், தீபாராதனை மேற்கொள்ளப்பட்டு பக்தா்களுக்குப் பிரசாதமும், அன்னதானமும் வழங்கப்பட்டது. கும்பாபிஷேகத்தைக் காண சுற்று வட்டார கிராம மக்கள் அனைவரும் கும்பாபிஷேக விழாவிற்கு பெருந்திரளானோா் கலந்து கொண்டு, சுவாமி தரிசனம் மேற்கொண்டனா்.