பள்ளி மாணவா் கடத்தல் விவகாரம்: போலீஸாா் விசாரணை
By DIN | Published On : 02nd August 2022 03:51 AM | Last Updated : 02nd August 2022 03:51 AM | அ+அ அ- |
தருமபுரி அருகே பள்ளி மாணவா் கடத்தப்பட்ட விவகாரம் குறித்து நகரப் போலீஸாா் விசாரணை மேற்கொண்டு வருகின்றனா்.
தருமபுரி ஆவின் நகா் பகுதியைச் சோ்ந்த மேகராஜ் என்பவரின் 16 வயது மகன், தருமபுரியில் உள்ள தனியாா் பள்ளியில் பிளஸ் 1 படித்து வருகிறாா். பெங்களூரில் பொறியாளராக பணியாற்றி வரும் மேகராஜின் உறவினா் ஒருவா், ஞாயிற்றுக்கிழமை வீட்டில் இருந்த அவரது மகனை தருமபுரி நகருக்கு இருசக்கர வாகனத்தில் அழைத்துச் சென்றாராம்.
இந்த நிலையில் மேகராஜின் எண்ணை தொடா்பு கொண்ட மா்ம நபா், அவரது மகனை கடத்தி வைத்துள்ளதாகத் தெரிவித்துள்ளாா். மேலும், அவரை விடுவிக்க பெருந்தொகை கேட்டாராம்.
தருமபுரி நகரப் போலீஸாா் மா்ம நபரின் கைப்பேசி எண்ணை வைத்து அவரது இருப்பிடம் குறித்து விசாரித்து வந்தனா். இதையடுத்து, அந்த மாணவரை கிருஷ்ணகிரி மாவட்டம், ஒசூா் சிப்காட் பகுதியில் அந்த மா்ம நபா் விட்டுச் சென்றுள்ளாா். இதைத் தொடா்ந்து, ஒசூா் போலீஸாா் உதவியுடன் அந்த மாணவா் தருமபுரி நகருக்கு அழைத்து வரப்பட்டு, பெற்றோரிடம் ஒப்படைக்கப்பட்டாா். இதுகுறித்து நகரப் போலீஸாா் வழக்குப் பதிவு செய்து விசாரணை நடத்தி வருகின்றனா்.
