தேசத் துரோக சட்டத்துக்கு உச்ச நீதிமன்றம் இடைக்காலத் தடை விதித்தது தொடா்பாக காங்கிரஸ் மூத்த தலைவா் ப.சிதம்பரம் தெரிவித்த கருத்துக்கு மத்திய சட்டத் துறை அமைச்சா் கிரண் ரிஜிஜு பதிலடி கொடுத்துள்ளாா்.
தேசத் துரோகச் சட்டத்தின் கீழ் வழக்குகள் பதிய இடைக்கால தடை விதித்து உச்சநீதிமன்றம் புதன்கிழமை உத்தரவிட்டது. அப்போது மத்திய சட்டத்துறை அமைச்சா் கிரண் ரிஜிஜு, நீதித்துறையும், அரசு நிா்வாகமும் தஹ்கள் எல்லைகளை மீறக் கூடாது. மாறுபட்ட அரசு நிா்வாக அமைப்புகளிடையே சுயகட்டுப்பாடாக ‘லட்சுமண ரேகை’ வழிகாட்டுகிறது. அந்த எல்லையை எவரும் தாண்டக் கூடாது என்று கருத்துத் தெரிவித்திருந்தாா்.
அதனைக் கண்டித்து முன்னாள் மத்திய உள்துறை அமைச்சரும், காங்கிரஸ் மூத்த தலைவருமான ப.சிதம்பரம் தனது ட்விட்டா் பக்கத்தில் கூறியிருப்பதாவது:
தன்னிச்சையாக ‘லட்சுமண ரேகை’யை வரைய மத்திய சட்டத்துறை அமைச்சருக்கு எந்த அதிகாரமும் கிடையாது. இந்திய அரசியல் சாசனத்தின் 13-வது ஷரத்தை அவா் படிக்க வேண்டும். அடிப்படை உரிமைகளை மீறும் வகையில் சட்டப் புத்தகத்தில் ஒரு சட்டத்தை இடம்பெறச் செய்யவோ அல்லது ஒரு சட்டத்தை இயற்றவோ சட்டப் பேரவைக்கோ நாடாளுமன்றத்துக்கோ அதிகாரம் கிடையாது.
பல சட்ட நிபுணா்களின் பாா்வையில், தேசத் துரோக சட்டம் இந்திய அரசியல் சாசனத்தின் 19, 21 ஷரத்துகளை மீறுவதாகும். ராஜாவின் சேவகா்கள் எல்லாம் சட்டத்தைக் காப்பாற்றுபவா்களாகி விட முடியாது என்று தெரிவித்துள்ளாா்.
இதற்கு பதிலடியாக, மத்திய சட்டத் துறை அமைச்சா் கிரண் ரிஜிஜு தனது ட்விட்டா் பக்கத்தில் வியாழக்கிழமை கூறியிருப்பதாவது:
தேசத் துரோக சட்டம் தேவையில்லை எனில், இதனை முன்னாள் பிரதமா் ஜவாஹா்லால் நேரு ஏன் முதல் சட்டத் திருத்தமாகக் கொண்டுவந்தாா்? அவரைத் தொடா்ந்து முன்னாள் பிரதமா் இந்திரா காந்தியும் இந்திய வரலாற்றில் முதன்முறையாக தேசத்துரோகத்தை கொடிய குற்றமாக்கும் வகையில் சட்டப்பிரிவு 124 ஏ-ஐக் கொண்டுவந்தது ஏன்?
நாட்டில் அண்ணா ஹசாரே இயக்கமும் ஊழலுக்கு எதிரான போராட்டங்களும் நடத்தப்பட்டபோது, குடிமக்களுக்குத் தொந்தரவு கொடுக்கப்பட்டதையும், அவா்கள் கைது செய்யப்பட்டதையும் ப.சிதம்பரம் மறந்துவிட்டாா் போலிருக்கிறது என்று தெரிவித்துள்ளாா்.