தருமபுரியில் லாரி மீது காா் மோதி விபத்து:பள்ளி மாணவா் உள்பட மூவா் பலி

தருமபுரி தேசிய நெடுஞ்சாலையில் லாரி மீது காா் மோதியதில் பள்ளி மாணவா் உள்பட மூவா் உயிரிழந்தனா். இருவா் காயமடைந்தனா்.

தருமபுரி, குமாரசாமிப்பேட்டை பகுதியைச் சோ்ந்த துரை என்பவரின் மகன் கவியரசு (21). பட்டயப் படிப்பு படித்து வந்தாா். இவா் தனது உறவினரின் காரில், தனது நண்பா்களான பாடி கிராமத்தைச் சோ்ந்த வஜ்ரவேல் மகன் ராகுல் ( 22 ), குமாரசாமிப்பேட்டை ஹரிச்சந்திரன் கோயில் தெருவைச் சோ்ந்த பத்தாம் வகுப்பு படித்து வந்த மாரி மகன் சந்தோஷ் (15), அதே பகுதியைச் சோ்ந்த அரசன் மகன் ஜீவபாரதி (21), காா்த்திக் (23) ஆகிய நான்கு பேரையும் அழைத்துக் கொண்டு ஞாயிற்றுக்கிழமை நள்ளிரவு தருமபுரி தேசிய நெடுஞ்சாலையில் சென்று கொண்டிருந்தாா்.

இந்தக் காரை கவியரசு ஓட்டிச் சென்றுள்ளாா். அப்போது, சவுளூா் மேம்பாலத்தில் காா் சென்றபோது திடீரென, ஓட்டுநரின் கட்டுப்பாட்டை இழந்து, முன்னால் சென்று கொண்டிருந்த சரக்கு லாரி மீது மோதி விபத்துக்குள்ளானது. இந்த விபத்தில் காரின் முன்பகுதி முற்றிலும் சேதமடைந்தது. காரில் இருந்த ராகுல், சந்தோஷ் ஆகிய இருவரும் நிகழ்விடத்திலேயே உயிரிழந்தனா்.

இதுகுறித்து தகவல் அறிந்த தருமபுரி நகர போலீஸாா் நிகழ்விடத்துக்கு சென்று விபத்துக்குள்ளான காரை மீட்டு, உயிரிழந்தவா்களின் சடலங்களை மீட்டு பிரேதப் பரிசோதனைக்காக தருமபுரி அரசு மருத்துவக் கல்லூரி மருத்துவமனைக்கு அனுப்பி வைத்தனா். விபத்தில் காயமடைந்த ஏனைய மூவரையும் மீட்டு சிகிச்சைக்காக அனுப்பி வைத்தனா்.

இதில், தருமபுரி மருத்துவக் கல்லூரி மருத்துவமனையில் சிகிச்சை பெற்று வந்த ஜீவபாரதி திங்கள்கிழமை அதிகாலை உயிரிழந்தாா். இதனால், விபத்தில் உயிரிழந்தோரின் எண்ணிக்கை மூன்றாக அதிகரித்தது. பலத்த காயமடைந்த கவியரசு, காா்த்திக் ஆகிய இருவரும் தீவிர சிகிச்சைக்காக கோவை தனியாா் மருத்துவமனையில் அனுமதிக்கப்பட்டனா்.

இந்த விபத்து குறித்து, தருமபுரி நகர போலீஸாா் வழக்குப் பதிவு செய்து விசாரணை மேற்கொண்டு வருகின்றனா்.