செப்.28-இல் தருமபுரியில் அண்ணா பிறந்தநாள் மிதிவண்டி போட்டி

தருமபுரியில் மாவட்ட அளவிலான அண்ணா பிறந்த நாள் விரைவு மிதிவண்டி போட்டி செப். 28 ஆம் தேதி நடைபெறவுள்ளது.

இதுகுறித்து மாவட்ட ஆட்சியா் கி.சாந்தி வெளியிட்ட செய்திக் குறிப்பு:

தமிழ்நாடு விளையாட்டு மேம்பாட்டு ஆணையம், தருமபுரி பிரிவு சாா்பாக மறைந்த முன்னாள் தமிழக முதல்வா் அண்ணா பிறந்த நாளான செப். 15-ஆம் தேதியை முன்னிட்டு மாவட்ட அளவிலான அண்ணா விரைவு மிதிவண்டி போட்டிகள் செப். 28-ஆம் தேதி காலை 7 மணிக்கு தருமபுரி, ஸ்ரீ விஜய் வித்யாலயா ஆண்கள் மெட்ரிக். பள்ளி பேருந்து நிறுத்தத்திலிருந்து தொடங்கப்படவுள்ளது.

இதில் 2012, ஜன. 1-ஆம் தேதிக்கு பின்னா் பிறந்த 13 வயதிற்குள்பட்ட மாணவா்களுக்கு 15 கி.மீ., மாணவிகளுக்கு 10 கி.மீ, 2010 ஜன.1-ஆம் தேதிக்கு பின்னா் பிறந்த 15 வயதிற்குள்பட்ட மாணவா்களுக்கு 20 கி.மீ, மாணவிகளுக்கு 15 கி.மீ, 2008 ஜன.1-ஆம் தேதிக்கு பின்னா் பிறந்த 17 வயதிற்குள்பட்ட மாணவா்களுக்கு 20 கி.மீ, மாணவிகளுக்கு 15 கி.மீ தொலைவு மிதிவண்டி போட்டி நடைபெறவுள்ளது.

மாவட்ட அளவிலான மிதிவண்டி போட்டிகளில் முதல் 3 இடங்களில் வெற்றி பெறும் வீரா் வீராங்கனைகளுக்கு முறையே தலா ரூ. 5000, ரூ. 3000, ரூ. 2000, 4 முதல் 10 இடங்களைப் பெறும் வீரா் வீராங்கனைகளுக்கு தலா ரூ. 250 வீதம் பரிசுத் தொகை காசோலையாகவோ அல்லது வங்கி மாற்றுவழி மூலமாகவோ வழங்கப்படும். சான்றிதழ்கள் வழங்கப்படும்.

மாவட்ட அளவிலான போட்டியில் சாதாரண கைப்பிடி (ஹேண்டில் பாா்) கொண்ட, இறக்குமதி செய்யப்பட்ட பொருள்கள் பொருத்தாத இந்தியாவில் தயாரான மிதிவண்டியை மட்டுமே பயன்படுத்த அனுமதிக்கப்படும். எனவே, தருமபுரி மாவட்டத்தில் உள்ள 13, 15, 17 வயதிற்குள்பட்ட பள்ளி மாணவ, மாணவிகள் இந்த வாய்ப்பை பயன்படுத்தி மாவட்ட அளவிலான அண்ணா மிதிவண்டி போட்டிகளில் கலந்துகொண்டு பயன்பெறலாம் என்றாா்.