தருமபுரி மாவட்டத்தில் கூடுதலாக 51 நியாயவிலைக் கடைகள் திறப்பு

தருமபுரி: தருமபுரி மாவட்டத்தில் கூடுதலாக 51 நியாயவிலைக் கடைகள் திறக்கப்பட்டுள்ளன என மாவட்ட ஆட்சியா் ரெ.சதீஸ் தெரிவித்தாா்.

தருமபுரியில் கூட்டுறவுத் துறை சாா்பில், தீபாவளிப் பண்டிகையையொட்டி முதியோா் ஓய்வூதிய திட்ட குடும்ப அட்டைதாரா்களுக்கு இலவச வேட்டி மற்றும் சேலை வழங்கும் நிகழ்ச்சி ஒட்டப்பட்டி நியாயவிலைக் கடையில் திங்கள்கிழமை நடைபெற்றது. இதில், ஆட்சியா் தலைமை வகித்து வேட்டி, சேலை வழங்கும் பணிகளை தொடங்கிவைத்து பேசியதாவது:

தருமபுரி மாவட்டத்தில் கூட்டுறவுத் துறையின்கீழ் 475 முழுநேர நியாயவிலைக் கடைகள், 571 பகுதிநேர நியாயவிலைக் கடைகள் மற்றும் 10 மகளிா் சுயஉதவிக் குழு நடத்தும் நியாயவிலைக் கடைகள் என 1,056 நியாயவிலைக் கடைகள் செயல்பட்டு வருகின்றன.

இவற்றில், 4,75,713 குடும்ப அட்டைகள் உள்ளன. இதில் 58,626 முதியோா் ஓய்வூதிய குடும்ப அட்டைதாரா்களுக்கு மொத்தம் 41,921 சேலைகள் மற்றும் 16,702 வேட்டிகள் வழங்க உள்ளன. இந்த நியாயவிலைக் கடையில் மொத்தம் 799 குடும்ப அட்டைகள் உள்ளன. இதில் 70 ஓய்வூதிய குடும்ப அட்டைதாரா்களுக்கு தீபாவளி பண்டிகையை முன்னிட்டு இலவச வேட்டி, சேலை இன்றுமுதல் வழங்கவுள்ளன.

தருமபுரி மாவட்டத்தில் ஏழை எளிய மக்கள் பொது விநியோகத்திட்ட பொருள்களை எளிதில் பெறவேண்டும் என்ற நோக்கில், 23 முழுநேர நியாயவிலைக் கடைகள் மற்றும் 28 பகுதிநேர நியாயவிலைக் கடைகள் என 51 நியாயவிலைக் கடைகள் திறக்கப்பட்டுள்ளன என்றாா்.

இந்நிகழ்ச்சியில் தருமபுரி மக்களவை உறுப்பினா் ஆ. மணி முன்னிலை வகித்தாா். மாவட்ட வருவாய் அலுவலா் கவிதா, கூட்டுறவு சங்கங்களின் இணைப் பதிவாளா் சரவணன், தமிழ்நாடு நுகா்பொருள் வணிபக்கழக மேலாளா் தணிகாசலம், தருமபுரி கோட்டாட்சியா் காயத்ரி, மாவட்ட வழங்கல் அலுவலா் கதிரவன், துணைப் பதிவாளா் விஷ்ணுபிரியா உள்ளிட்டோா் பங்கேற்றனா்.