நாளை பொது விநியோகத் திட்ட குறை தீர் கூட்டம்

கிருஷ்ணகிரி மாவட்டத்தில் பொது விநியோகத் திட்ட குறை தீர் கூட்டம் சனிக்கிழமை (ஜூன் 10) நடைபெறுகிறது.
இதுகுறித்து மாவட்ட வழங்கல் அலுவலர் குமரேசன் வியாழக்கிழமை வெளியிட்ட செய்தி: கிருஷ்ணகிரி மாவட்டத்தில் பொது விநியோகத் திட்டத்தில் காணப்படும் குறைபாடுகளை களைவதற்கும், மக்களின் குறைகளைக் கேட்டு உடனுக்குடன் அவற்றை நிவர்த்தி செய்யவும், குடும்ப அட்டைகளில் பெயர் திருத்தம், சேர்த்தல், நீக்கல். முகவரி மாற்றம் போன்ற குறைபாடுகளை நிவர்த்தி செய்யும் வகையில் ஜூன் 10-ஆம் தேதி காலை 10 முதல் பிற்பகல் 1 மணி வரை பொதுவிநியோகத் திட்ட சிறப்பு குறை தீர் கூட்டம் அந்தந்த வட்ட வழங்கல் அலுவலர்களால் நடத்தப்படுகிறது. அதன்படி, கிருஷ்ணகிரி வட்டத்தில் கும்மனூர் கிராமத்திலும், ஊத்தங்கரை கெரிகேப்பள்ளி, போச்சம்பள்ளி கொடமாண்டப்பட்டி, பர்கூர் வரட்டனப்பள்ளி, சூளகிரி பாத்தகோட்டா, ஒசூர் மொத்தஅக்ரஹாரம், தேன்கனிக்கோட்டை மதகொண்டப்பள்ளி ஆகிய கிராமங்களில் நடைபெறுகிறது. எனவே, இந்த குறை தீர்க்கும் நாள் கூட்டத்தில் பொதுமக்கள் தங்களது குறைகளை வட்ட வழங்கல் அலுவலர்களிடம் தெரிவித்து பயன்பெறுமாறு அதில் தெரிவிக்கப்பட்டுள்ளது.