கிருஷ்ணகிரி மாவட்ட மைய நூலகத்தில் இ-மேகஸின் இணையதள வசதி தொடக்கம்

கிருஷ்ணகிரி மாவட்ட மைய நூலகத்தில் இ-மேகஸின் என்ற இணையதள வசதி தொடங்கப்பட்டுள்ளது.
 இதுகுறித்து மாவட்ட மைய நூலக அலுவலர் சக்திவேல் வெளியிட்ட செய்திக்குறிப்பு:
 கிருஷ்ணகிரி மாவட்ட மைய நூலகத்தில் இ-மேகஸின் என்ற இணையதள வசதி செய்யப்பட்டுள்ளது. இந்த இணையதளத்தை நூலக உறுப்பினர்கள், வாசகர்கள், பள்ளி மாணவ, மாணவிகள் என அனைவரும் பயன்படுத்தலாம். இதில் அனைத்து மொழிகளிலும், அனைத்து பருவ இதழ்களையும் படிக்கும் வசதி உள்ளது. இந்த பருவ இதழ்கள் துறை வாரியாக தனித்தனியாக பிரிக்கப்பட்டு, நமக்கு தேவையான பிரிவை தேர்வு செய்து படிக்கும் வசதி ஏற்படுத்தப்பட்டுள்ளது.
 இவை அனைத்தும் மாவட்ட மைய நூலகத்தில் முற்றிலும் இலவசமாக வாசகர்களின் பயன்பாட்டுக்கு வைக்கப்பட்டுள்ளது. வாசகர்கள் தங்கள் மின் அஞ்சல் முகவரியை மட்டும் இதில் பதிவு செய்து, தங்களுக்கு தேவையான பருவ இதழ்களை இலவசமாக படிக்கலாம். இதற்காக பதிவேடு ஒன்று மாவட்ட மைய நூலகத்தில் பராமரிக்கப்படுகிறது.
 இதில் வாசகர்கள் தங்கள் பெயர், செல்லிடப்பேசி எண், மின் அஞ்சல் முகவரியைப் பதிவு செய்ய வேண்டும். இந்த வசதி மாவட்ட மைய நூலகத்தில் மட்டுமே ஏற்படுத்தப்பட்டுள்ளதால் வாசகர்கள் அனைவரும், இதனைப் பயன்படுத்தி பயனடையுமாறு அதில் அவர் கேட்டுக் கொண்டார்.