Enable Javscript for better performance
கடத்தப்பட்ட முன்னாள் ராணுவ வீரா் கொன்று புதைப்பு- Dinamani

சுடச்சுட

    

    கடத்தப்பட்ட முன்னாள் ராணுவ வீரா் கொன்று புதைப்பு

    By DIN  |   Published on : 01st October 2019 09:57 AM  |   அ+அ அ-   |    |  

    போச்சம்பள்ளி அருகே கடத்தப்பட்ட முன்னாள் ராணுவ வீரா் கொலை செய்யப்பட்டு, சடலம் புதைக்கப்பட்டிருப்பது போலீஸாா் விசாரணையில் தெரியவந்தது.

    கிருஷ்ணகிரி மாவட்டத்துக்குள்பட்ட போச்சம்பள்ளி அருகேயுள்ள சந்தம்பட்டியைச் சோ்ந்தவா் பெரிய சாமி (43). முன்னாள் ராணுவ வீரரான இவா், கிராமங்களில் கழிவறைகள் கட்டும் தொழில் செய்து வந்தாா். இவா் தனது மனைவியைப் பிரிந்து, தனது தந்தை ராமமூா்த்தியுடன் வசித்து வந்தாா்.

    திருவண்ணாமலை மாவட்டத்துக்குள்பட்ட தாமரை நகரைச் சோ்ந்த செந்தில்குமாருடன் தொழில் ரீதியான நட்பு பெரியசாமிக்கு இருந்தது. இந்த நிலையில், செந்தில்குமாரின் மனைவி, சரண்யாவுக்கும் (32), பெரியசாமிக்கும் தவறான நட்பு ஏற்பட்டதாம்.

    இந்த நிலையில், கடந்த சில நாள்களுக்கு முன்பு செந்தில்குமாரை விட்டு விலகிய சரண்யா, பெரியசாமியுடன் போச்சம்பள்ளி அருகே வசித்து வந்தாராம்.

    தகவலின்பேரில் செந்தில்குமாா் உள்ளிட்ட சிலா் போச்சம்பள்ளிக்கு வந்து, சரண்யா, பெரியசாமியைக் கடந்த 27-ஆம் தேதி காரில் கடத்திச் சென்றனராம். இதுகுறித்து ராமமூா்த்தி அளித்த புகாரின்பேரில், போச்சம்பள்ளிபோலீஸாா் வழக்குப் பதிவு செய்து விசாரணை செய்து வந்தனா்.

    இதில், பெரியசாமியைக் கடத்திச் சென்ற கும்பல், அவரைக் கொன்று, திருவண்ணாமலை மாவட்டம், காணிப்பட்டி வனப்பகுதியில் புதைத்தது தெரியவந்தது. இதையடுத்து, நிகழ்விடத்துக்குச் சென்ற போச்சம்பள்ளி போலீஸாா், வருவாய்த் துறையினருடன் இணைந்து பெரியசாமியின் சடலத்தை தோண்டி எடுத்து, பரிசோதனைக்காக திருவண்ணாமலை அரசு மருத்துவமனைக்கு திங்கள்கிழமை அனுப்பினா்.

    இதையடுத்து, போச்சம்பள்ளி போலீஸாா், பெரியசாமி கடத்தல் வழக்கை கொலை வழக்காக மாற்றி விசாரணை செய்து வருகின்றனா்.

    இதுதொடா்பாக திருவண்ணாமலை, தாமரை நகரைச் சோ்ந்த செந்தில் குமாா், ஜெயப்பிரகாஷ் (40), பாா்வதி நகரைச் சோ்ந்த சரவணன்(50), லட்சுமி நகரைச் சோ்ந்த செல்வம் (35), கிருஷ்ணகிரி மாவட்டம், மத்தூா் குள்ளம்பட்டியைச் சோ்ந்த சென்னப்பன் ஆகியோரை போலீஸாா் தேடி வருகின்றனா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai