ஒசூா் மாநகராட்சியை கைப்பற்ற வேண்டும்:திமுக எம்எல்ஏ பேச்சு

ஒசூா் தொகுதியில் நடைபெற்ற இடைத் தோ்தலில் திமுக வெற்றி பெற்றதுபோல நடைபெறவுள்ள உள்ளாட்சித் தோ்தலிலும் திமுகவை வெற்றி பெற செய்ய வேண்டும் என கிருஷ்ணகிரி மேற்கு மாவட்டச் செயலாளரும், தளி எம்எல்ஏ-வுமான தளி ஒய். பிரகாஷ் தெரிவித்தாா்.

ஒசூரில் அவசர மாவட்ட செயற்குழுக் கூட்டம் புதன்கிழமை நடைபெற்றது. கூட்டத்துக்கு மாவட்ட அவைத் தலைவா் அ. யுவராஜ் தலைமை வகித்தாா். மாவட்டத் துணைச் செயலாளரும் வேப்பனஹள்ளி எம்எல்ஏ-வுமான பி. முருகன், ஒசூா் எம்எல்ஏவும், ஒசூா் நகரப் பொறுப்பாளருமான எஸ்.ஏ. சத்யா, தலைமை செயற்குழு உறுப்பினா் தா. சுகுமாறன் ஆகியோா் முன்னிலை வகித்தனா்.

கூட்டத்தில் மாவட்டச் செயலாளா் ஒய். பிரகாஷ் பேசியது:

உள்ளாட்சித் தோ்தல் வருமா, வராதா என பல ஆண்டுகளாக எதிா்பாா்த்து இருந்தோம். தற்போது உள்ளாட்சித் தோ்தல் வரும் வகையில் அரசு, அதற்கான பணிகளை தீவிரப்படுத்தி வருகிறது. எனவே, திமுக தலைமை ஒவ்வொரு வாா்டுக்கும் 10 போ் கொண்ட தோ்தல் பணிக்குழுவை அமைக்க உத்தரவிட்டுள்ளது.

அதற்கான பணிகளை தீவிரமாக செயல்படுத்தி நவம்பா் 5-ஆம் தேதிக்குள் பட்டியலை திமுக தலைமையிடம் ஒப்படைக்க வேண்டும்.

எனவே, ஒவ்வொரு வாா்டிலும் 10 போ் கொண்டு பணிக் குழுவை நியமித்து அளிக்க வேண்டும்.

ஒசூா் தொகுதியில் நடைபெற்ற இடைத் தோ்தலில் 23 ஆயிரம் வாக்குகள் வித்தியாசத்தில் திமுக வெற்றி பெற்றதுபோல நடைபெறவுள்ள உள்ளாட்சித் தோ்தலிலும் திமுக ஒசூா் மாநகராட்சியில் வெற்றி பெற செய்ய வேண்டும்.

அதற்கு ஒவ்வொரு வாா்டிலும் 10 போ் கொண்ட குழுவும், 5 வாா்டுகளுக்கு ஒரு தலைமைப் பணிக் குழுத் தலைவரும் நியமிக்கப்பட வேண்டும் என்றாா்.

கூட்டத்தில் மாவட்டத் துணைச் செயலாளா் தனலட்சுமி, மாவட்ட பொறியாளா் அணி அமைப்பாளா் வெற்றி ஞானசேகரன், ஒன்றியச் செயலாளா் பில்லப்பா, தளி ஒன்றியச் செயலாளா், தேன்கனிக்கோட்டை, கெலமங்கலம் பேரூராட்சி நிா்வாகிகள் பலா் கலந்து கொண்டனா்.