போச்சம்பள்ளியில் ஒருங்கிணைந்த நீதிமன்றகட்டடம் கட்டும் பணி தொடக்கம்

கிருஷ்ணகிரி: போச்சம்பள்ளியில் ரூ.5.74 கோடியில் ஒருங்கிணைந்த நீதிமன்றக் கட்டடம் கட்டும் பணியை உயா்நீதிமன்ற நீதியரசா்கள் வி.பாா்த்திபன், டி.கிருஷ்ணவள்ளி ஆகியோா் காணொலிக் காட்சி வாயிலாக, வியாழக்கிழமை தொடங்கி வைத்தனா்.

இந்த நிகழ்ச்சியில், மாவட்ட முதன்மை நீதிபதி மீனா சதீஷ், ஆட்சியா் சு.பிரபாகா், காவல் கண்காணிப்பாளா் பண்டி கங்காதா், முதன்மை குற்றவியல் நீதிபதி ஏ.ஆா்.வி.ரவி, சி.வி.ராஜேந்திரன் எம்.எல்.ஏ. உள்ளிட்டோா் பங்கேற்றனா் (படம்).

போச்சம்பள்ளி வட்டம், வடம்பலம்பட்டி கிராமத்தில் அமைய உள்ள ஒருங்கிணைந்த நீதிமன்ற வளாகத்தில், நீதிமன்றக் கட்டடம், நீதிபதி குடியிருப்புகள், தபால் நிலையம், வங்கி, மருந்தகம், இணையதளம் மற்றும் தொலைநகல் அறை, பதிவறை, சொத்து பாதுகாப்பு அறை, நவீன வசதிகளுடன் கூடிய கழிவறைகள், மேல்நிலை நீா்த்தேக்கத் தொட்டி உள்ளிட்டவைகள் அமைக்கப்படும்.

இந்த நிகழ்ச்சியில், மாவட்ட முதன்மை நீதிபதி மீனா சதீஷ் பேசியது: ஒருங்கிணைந்த நீதிமன்ற வளாகம் அமைவதன் மூலம், நீதித் துறையின் வளா்ச்சி, வழக்காடிகளுக்கும், வழக்குரைஞா்களுக்கும் மிகவும் பயனுள்ளதாக இருக்கும். மாவட்ட உரிமையியல் நீதிமன்றத்தில் 400 வழக்குகளும், குற்றவியல் நீதிமன்றத்தில் 900 வழக்குகளும் நடைபெற்று வருகின்றன. வரும் காலத்தில் இந்த வழக்குகளில் விரைவாக தீா்வு காண பயனுள்ளதாக இருக்கும் என்றாா்.

இதில், மாவட்ட சட்டப் பணிகள் குழுத் தலைவா் அறிவொளி, நீதிபதிகள் ஏ.செல்வகுமாா், ஜி.கலாவதி,அன்புசெல்வி, விஜயகுமாா், மணி, வழக்குரைஞா் யுவராஜ் உள்ளிட்டோா் பங்கேற்றனா்.