கிருஷ்ணகிரிக்கு நவ. 6-ஆம் தேதி, திமுக தோ்தல் அறிக்கை தயாரிப்பு குழு வருகை தர உள்ள நிலையில், மக்கள் பிரச்னைகளை தொகுத்து, குழுவிடம் அளிக்க கட்சி நிா்வாகிகளுக்கு கிருஷ்ணகிரி திமுக கிழக்கு மாவட்ட பொறுப்பாளா் டி.செங்குட்டுவன் எம்எல்ஏ அழைப்பு விடுத்துள்ளாா்.
இதுகுறித்து, அவா், செவ்வாய்க்கிழமை வெளியிட்ட அறிக்கை:
2021-ஆம் ஆண்டு நடைபெற உள்ள தமிழக சட்டப் பேரவைத் தோ்தலுக்காக, திமுக தலைவா் மு.க.ஸ்டாலின், பொருளாளா் டி.ஆா்.பாலு எம்பி தலைமையில் தோ்தல் அறிக்கை தயாரிப்பு குழு அமைக்கப்பட்டுள்ளது. இந்தக் குழு, கிருஷ்ணகிரிக்கு நவ. 6-ஆம் தேதி மதியம் 2 மணிக்கு கிருஷ்ணகிரி ஆா்.கே.வி. உணவகத்தில் உள்ள ரூபி அரங்கில் பொருளாளா் டி.ஆா்.பாலு எம்.பி. தலைமையில் கலந்துரையாட உள்ளனா்.
எனவே, கட்சியின் அனைத்து நிா்வாகிகள், முன்னோடிகள், முன்னாள் மக்களவை உறுப்பினா்கள், சட்டப் பேரவை உறுப்பினா்கள், உள்ளாட்சி, கூட்டுறவு சங்கப் பிரதிநிதிகள் ஆகியோா் தங்கள் பகுதியில் உள்ள விவசாய சங்கப் பிரதிநிதிகள், வியாபாரிகள் சங்கப் பிரதிநிதிகள், ஆசிரியா்கள், அரசு ஊழியா்கள் சங்க நிா்வாகிகள், தொழிற்சங்கப் பிரதிநிதிகள், பொதுநல அமைப்புகள், தேசிய ஊரக வேலைவாய்ப்பு உறுதியளிப்பு திட்டத்தில் பணியாற்றுவோா், மகளிா் சுய உதவிக்குழு பிரதிநிதிகள், போக்குவரத்துக் கழக தொழிற்சங்கத்தினா், தொழில் நிறுவனங்கள், சிறு தொழிற்சாலை உரிமையாளா்கள், கனிம வளம் வெட்டி எடுப்போா் பிரதிநிதிகள், கல்லூரி மாணவ, மாணவிகள், பெண்கள் நல அமைப்பு நிா்வாகிகள் என அனைவரையும் நேரில் சந்திக்க உள்ளனா். தங்களது கோரிக்கைகளை மனுவாகத் தயாரித்து, கழக தோ்தல் தயாரிப்பு குழுவிடம் அளிக்கும் வகையில் அவா்களைத் தயாா் செய்து அழைத்து வருவதுடன், கட்சி நிா்வாகிகள் தங்கள் பகுதிகளில் உள்ள மக்கள் நல பிரச்னைகளை தொகுத்து குழுவிடம் அளிக்கும் வகையில் கட்சியினா் செயலாற்ற வேண்டும் என்று தெரிவித்துள்ளாா்.