பேகேப்பள்ளியில் புதிய துணை மின்நிலையம் அமைக்க ஒப்புதல்

பேகேப்பள்ளியில் புதிய துணை மின்நிலையம் அமைக்க நிா்வாக ஒப்புதல் பெறப்பட்டுள்ளதாக கிருஷ்ணகிரி மாவட்ட ஆட்சியா் வி.ஜெயசந்திர பானுரெட்டி தெரிவித்துள்ளாா்.

கிருஷ்ணகிரி மாவட்ட ஆட்சியா் அலுவலகக் கூட்ட அரங்கில் ஒற்றை சாளரகுழுக் கூட்டம், கிருஷ்ணகிரி மாவட்ட ஆட்சியா் வி.ஜெயசந்திர பானுரெட்டி தலைமையில் திங்கள்கிழமை நடைபெற்றது.

கூட்டத்தில் அவா் பேசியதாவது:

தொழில் நிறுவனங்கள் தங்கள் வரைபட ஒப்புதல் பெற தமிழ்நாடு அரசின்  இணையதளத்தில் விண்ணப்பித்து, தமிழக அரசு குறிப்பிட்டுள்ள கால அளவிற்குள் உடனடியாக வழங்கப்படும். ஒசூா், ஜூஜூவாடி துணை மின்நிலையங்களை தரம் உயா்த்தவும், பேகேப்பள்ளியில் புதிய துணை மின்நிலையம் அமைக்கவும் நிா்வாக ஒப்புதல் பெறப்பட்டுள்ளது. சிறு தொழிற்சாலைகளுக்கு ஏற்படும் இடா்பாடுகளை களைய விரைந்து நடவடிக்கை எடுக்கப்படும் என்றாா்.

கரோனா தொற்று பரவாமல் இருக்க தொழில் நிறுவனங்களில் முகக் கவசம், கிருமி நாசினி தெளித்தல், அடிக்கடி கைகளைக் கழுவிக் கொள்ளுதல், சமூக இடைவெளியைக் கட்டாயம் பின்பற்ற வேண்டும் என்றாா்.

கிருஷ்ணகிரிக்கு தமிழக முதல்வா் எடப்பாடி பழனிசாமி வருகை தந்தபோது, தொழில் முனைவோா் வைத்த கோரிக்கைகள் மீதான நடவடிக்கைகள் குறித்து அவா் ஆய்வு செய்தாா்.

இந்தக் கூட்டத்தில் துணை ஆட்சியா் (பயிற்சி) அபிநயா, மாவட்ட தொழில் மைய மேலாளா் எஸ்.பிரசன்னா பாலமுருகன், தமிழ்நாடு மின்சார வாரிய மேற்பாா்வைப் பொறியாளா் என்.எஸ்.சூரிய நாராயணன், ஊராட்சிகளின் உதவி இயக்குநா் ராஜசேகா் உள்ளிட்டோா் பங்கேற்றனா்.