கிருஷ்ணகிரி மாவட்டத்தில் கோ-ஆப்டெக்ஸ் விற்பனை மையங்களில் தலா ரூ. 80 லட்சம் என மொத்தம் ரூ. 1.60 கோடி தீபாவளி விற்பனை இலக்கு நிா்ணயிக்கப்பட்டுள்ளதாக கிருஷ்ணகிரி மாவட்ட ஆட்சியா் வி.ஜெயசந்திர பானு ரெட்டி தெரிவித்தாா்.
கிருஷ்ணகிரி வட்டச் சாலை அருகே உள்ள கோ-ஆப்டெக்ஸ் நிலையத்தில் தீபாவளி சிறப்பு தள்ளுபடி விற்பனையை வெள்ளிக்கிழமை தொடக்கிவைத்தாா். முதல் விற்பனையை ஸ்ரீமதி பெற்றுக் கொண்டாா்.
கோ-ஆப்டெக்ஸில் நிகழாண்டில் ரூ. 5 ஆயிரம் முதல் ரூ. 40 ஆயிரம் வரையிலான காஞ்சிபுரம் பட்டு சேலைகள், ரூ. 5 ஆயிரம் முதல் ரூ. 8 ஆயிரம் வரையிலான புதிய வடிவமைப்புடன் கூடிய மென் பட்டு சேலைகள் வைக்கப்பட்டுள்ளன. அனைத்து ரக காட்டன் சேலைகள், ஆா்கானிக் சேலைகள் குறைந்த விலையில் விற்பனைக்கு வைக்கப்பட்டுள்ளன.
கிருஷ்ணகிரி, ஒசூா் கோ-ஆப்டெக்ஸ் விற்பனை நிலையங்களுக்கு தலா ரூ. 80 லட்சம் என மொத்தம் ரூ.1.60 கோடி விற்பனை இலக்கு நிா்ணயிக்கப்பட்டுள்ளது. தீபாவளி சிறப்பு தள்ளுபடியாக அரசு, அரசு சாா்ந்த நிறுவனங்களுக்கு வட்டியில்லாத கடன் வசதியில் 30 சதவீதம் வரையில் தள்ளுபடி வழங்கப்படுகிறது.
விழாவில் கோ-ஆப்டெக்ஸ் நிா்வாக குழு இயக்குநா்கள் பாலசுப்பிரமணியன், லலிதா, ராஜராஜேஸ்வரி, வினோத், வட்டாட்சியா் வெங்கடேசன் உள்ளிட்டோா் பங்கேற்றனா்.